呢幾日個市咁靜，仲以為「歲晚收爐」，不過，昨日國內銀行同保險股生猛番，仲幾有勢，帶H指升218點，先至有番啲希望，過年前股民仲有機會賺番筆。
港股未現突破，股民入市嘅態度好謹慎，越謹慎個市就越難突破，因為突破要有資金推動，要有成交，呢個係雞同雞蛋嘅問題，如果冇消息帶個市突破（即係話吸引股民入市），個市都會係原地踏步。
睇工行（1398）同國壽（2628）兩隻恒指新貴大熱呢兩日嘅表現，炒高呢兩隻股帶動國企股上，再由國企股帶個市上，好似係好友嘅策略，H股金融行業指數由年初殘到𠵱家，昨日終於見起色，一口氣升破10日同20日線，仲有成交支持，9RSI向上突破，企喺55.4，有大把水位，除工行同國壽外，其他「五行三保」嘅成員隻隻都唔失禮，如果大家昨日無上車，今朝早就早啲埋位嘞。
工行C輪6042：工行昨收4.67元，大成交升破20日線，升破4.75元之後，就會推向上市到𠵱家嘅高位5.22元，所以破咗4.80元就係加注嘅好機會。工行C輪6042昨收40仙，槓桿率11.7倍（有效7.1倍），對沖值0.61，正股升上5元，6042應該喺60仙樓上，正股試5.22元，隻輪應該唔低過75仙，正股跌穿4.55元止蝕。
港交所C輪6075：港交所（388）昨收88.35元，重上10日線，國企股如炒上，大市嘅成交有機會上番600億元，港交所會趁勢試番93.50元高位，破位就睇98元，港交所C輪6075昨收1.22元，有效槓桿率5.5倍，正股升上93.50元同98元，6075應該喺1.63元同2元樓上，正股跌穿86元止蝕。
俊樺