港股繼續在高位大上大落，恒指曾一度下跌十多點，但大戶買盤一入市，行情立即由低位抽上，結果又大升番200點，期指保持近50點高水。恒指在2萬點大關之上整固已成個月，獲利貨已消化得七七八八，唔排除在農曆新年長假前會急升一轉。
做投資者，揸到一隻長升長有嘅股票，嗰種滿足感，真係用錢都買唔到。本欄接連分析過唔少次的「愛股」，有中國林大資源（910）（前金威集團）、世紀陽光（8276）、同浩倫農科（1073）等，真係升完可以再升，就算𠵱家入市，向上望仍然有好大水位。
今日再講林大，上個月升上1.20元水平後，整固大半個月，又再升過，噚日上到1.33元，回收1.31元，又升3仙，成交好活，有成1.9億股，動力好強，短期可向1.50元的上升目標推進。
發展步伐速
林大轉型高科植林，發展步伐非常迅速，平均每一個月都有一至兩個收購項目，最近又在山西省平陸縣取得50萬畝林地作發展之用。
現時林大已有意向收購的林地超過1100萬畝，而實際擁有的林地儲備則接近50萬畝。集團收購林地後，砍伐現有的林木，已可提供收入，而騰空的林地又用作種植經基因改良的桑科構樹，提供更大收益。
木材係造紙的主要原料，林大委託中國製漿造紙研究院，對桑科構樹進行測試，包括材性特點、纖維品質、製漿造紙參數指標等，都獲得研究院的正面評價，有助林大加快木材銷售及提升議價能力。
林大現時市值接近70億元，以日後有更多林地「投產」，每年盈利係以10億元計，前景樂觀，一兩年後，林大股價升上3元水平的機會好大。
郭兆誠