成日有人話新樓實用面積低買唔過，咁樓齡有番咁上下嘅舊樓，又買唔買得過呢？網友calvinhung最近喺屯門時代廣場睇中一個300幾平方呎嘅單位，60幾萬銀，打算分20年供，本來樣樣都幾合佢心意，唯一就係樓齡已經有18年，擔心供甩後都成38年樓齡，再賣出去會唔值錢，心大心細嘅佢於是喺《香港討論區》廣徵網民意見。
LMB好風趣咁回應︰「以女仔嚟講係卜卜脆㗎，以樓嚟講就……」mostertvb就認為樓價同樓齡係成反比，樓齡每年增長，樓價就按年遞減至少3%。
不過，亦有唔少網友提到，舊樓值唔值錢好難一概而論，至緊要睇地區，其中Gattermond就舉例，18年前，佢朋友捨棄九龍塘一個有14年樓齡嘅1500方呎單位，走去買黃埔新樓，結果呢個當年只值100萬嘅九龍塘單位，今時今日已經攀升至900萬，升值能力驚人。
唔使供完至換樓
務實派代表socho就勸calvinhung︰「好少人會供足20年㗎，未供完都可以換樓啦，唔使諗咁遠嘅！」scl20062006亦係咁話︰「供住先啦，遲啲換過間咪得囉，幾時都有上車客㗎啦！」
事實上，從地產專業角度，舊樓有冇保值能力，好多時真係唔係單睇物業本身，而係睇佢嘅地段同供應量，好似跑馬地、中半山、九龍塘等傳統豪宅區，好多樓都有30、40年樓齡，但依然有升值潛力。
另外，同屬舊樓，大型屋苑嘅抗跌力就比單幢樓優秀，例如荔枝角美孚新邨、鰂魚涌太古城咁，因為維修管理質素好，所以今時今日嘅呎價依然硬淨，仲要有價有市。