舊年開始個股市旺到不得了，同股市相關的金融業及銀行業都求才若渴，少啲財力都留唔住班出色員工。美國運通銀行香港區行政總裁黃翼超同傳媒食飯時，就分享吓點樣請人同埋留人。
佢話，舊年運通私人銀行嘅員工流失率，絕對係全行最低，RelationsManager（RM）平均都做咗7.5年，留得住員工當然要有一套妙計。
包場請員工食雪糕
佢話，畢業生想喺運通做RM，就要由低位AccountExecutive做起，底薪已有五位數字，但係最難嘅係，公司內部有個系統去評核應徵者值幾多分，得28分或以上先至有面試機會，唔達標嘅唔要。不過，佢就唔肯講點先拎到28分，只係話學歷同經驗都好重要，但更重要係有台型，畀人端莊、有誠信嘅感覺。
佢仲賣花讚花香，話員工唔單止有培訓，公司嘅Women'sInterestsClub仲會不斷為員工謀福利，上次先包咗Haagen-Dazs兩個鐘，請班員工食雪糕食個痛快。睇嚟各大公司都要諗定妙計留人喇！
[email protected]