曾蔭權應承「我會做好呢份工」，這份不是新工作，家陣已經做緊，目前做得夠好未呢？照口號字面睇，意思是會留力，等名正言順連任後才發威發力。以運動競技評論，留力衝刺當然不違反比賽規則。
預先張揚做好份工，getdone而不是welldone，並非做得更加好，老老實實，在自我評估調查欄裏，不是填寫excellent或者verygood，實際地揀fine或者OK，沒有油魚充鱈魚，腩排充和牛。對市民消費者來講，算是童叟無欺貨真價實。政壇確保必須杜絕人和寵物共憤的「白玉豚」。曾蔭權只係想打好份工，不是暗渡陳倉，絕無反骨起尾注之心。現實上也不容曾蔭權起飛腳或者另起爐灶，不過為了加強老闆的信心，公開表達打工仔的忠誠是最好和最少誤會的。
我會做好呢份工，言下之意，我打工仔一名，唔好留難我，有乜事幹，搵大老闆講數啦。對大老闆的訊息也明顯甚，我打份牛工，份內做好佢，係咁多，絕對不搞敢死賣命，北大佬鞠躬盡瘁、死而後已那一套，冇預我這個香港仔。來日方長，我想等兩個乖仔各自生三個，六個孫跟我玩伏匿匿、釣錦鯉。嗯，不期然同情起曾蔭權，連任後發現，忽然多出很多老細。那批前列腺做過手術用半顆睾丸思考問題、在他們的商業王國裏頤指氣使比胡錦濤變態的闊佬富豪，玩弄着手上一隻名廠煲呔，正陰陰笑，等着曾蔭權切燒豬拜神開工。