「自古多情空餘恨」!美國有女太空人驅車1,600公里,向情敵射胡椒噴霧;巴西亦有「星爸」駕「烈火戰車」追殺「姦夫」,呢位星爸就係雲達不來梅球星廸亞高嘅父親古奴。古奴周三遭警方拘捕被控「企圖謀殺」,廸亞高收到消息後表情鎮定,並堅持代表巴西鬥葡萄牙嗰場友賽,專業抵讚!
父親兼為經理人
古奴今年都52歲喇,佢知悉愛妻背住佢偷食後,已經恐嚇過「姦夫」;點知後者態度依舊,同廸亞高媽媽保持親密來往,所以古奴終於忍唔住,日前處心積慮用假地址租架「烈火戰車」搵情敵尋仇!「姦夫」講番遇襲過程:「古奴搵架電單車撞完我,我已經跌咗喺地,佢仲想衝過嚟打我一鑊!」
古奴嘅律師表示,佢當事人會否認控罪,並申請保釋外出;至於遠在英國倫敦嘅廸亞高,就將全副精神放喺前日巴西硬撼葡萄牙嘅比賽上,佢知道事件後只係表示「極度震驚」,但拒絕離隊飛返巴西;或者,巴西教練鄧加就係欣賞此子嘅專業精神,所以有派坐喺後備席上嘅廸亞高落場。
古奴查實係囝囝廸亞高嘅經理人,求大俠諗佢會唔會用得太多時間處理囝囝嘅事業,導致愛妻紅杏出牆呢?
「被巴西傳媒譽為『新卡卡』嘅廸亞高,喺德甲撈得風生水起,希望今次不愉快事件快啲過去,以免影響佢場上心情啦!」