如果冇開網上證券戶口，抽新股吓吓都要白紙黑字咁填表，有時真係幾麻煩。網友忘我hk喺《香港討論區》呻，覺得IPO張表格要填「職業」好鬼多餘，「都唔知職業同我抽新股有咩關係，寫信去聯交所問仲衰，答咗等於無答。好多時我諗，你戇居要人填，我都要陪你咁戇居，如果唔係可能唔畀你抽㖭，真係好無奈。」
lob_9似乎想解釋一下：「填職業都有啲用處，就係公司主席有時想睇吓自己嘅股票，分到乜嘢人手上，所以職業都可能係一個分配準則。」
似有歧視嫌疑
忘我hk好㷫咁回應：「咁就已經違反咗公平原則啦，所以，如果要填，會增加不公平機會。如果想睇吓分到咩人手上，不如叫人填埋收入、有幾多財產、屋企有咩人、身高、體重啦。」
aforangie好疑惑咁講：「我就係次次填無做嘢，次次都抽唔中，所以今次我填有嘢做。」logst好似知道內情咁話：「股東嘅職業，公司係有權知，你唔好以為股票係張紙咁簡單。」
好多網友就認為填「職業」唔使咁認真，仲有好多好有創意嘅選擇㖭，pilotsam每次都填「farmer（農夫）」；DecemberRain就問：「寫香港討論版主或壇主得唔得呢？」garyyin似乎想玩寸政壇，「填港交所未來主席，或者未來特首會點呢？」
寫投資者實啱
0023abcde最直接：「填投資者。」BOB_YEUNG就擺明考中文，「我見有人填『下士』。」。
查番字典，先知係解淺俗嘅人；或者俗啲講，係cheap人囉。SudanRed附和：「填寡人、師奶、娘娘都得。」