吳彥祖要結婚？相信這會傷透無數少女的芳心。早前其拍拖多年的名模女友LisaS.向傳媒坦露了一顆恨嫁的心，表示會快過樂基兒結婚。前晚兩口子結伴出席首映禮，吳彥祖聲稱暫時未適合成家立室，但就向女友開出期票，表示計劃於五年後結婚。唉！有型又靚仔的鑽石王老五又少一名了。
電影《翻生侏羅館》前晚在佐敦維港巨幕舉行首映禮，吳彥祖偕名模女友LisaS.、朱茵、陳法蓉和蔡少芬等應邀出席。
日前LisaS.出席活動時宣稱自己的婚期會快過樂基兒，前晚吳彥祖笑道：「我冇聽佢講過。」談到LisaS.透露其家人十分喜歡他，吳彥祖就說：「我都好鍾意佢屋企人。」
為生BB才結婚
雖然女友預告婚訊，但吳彥祖表示沒想過短期內組織家庭，他說：「冇咁快，都唔得閒結婚住，兩個都咁忙。結婚係代表要組織家庭，呢個時候生小朋友唔係咁啱，因為成日飛嚟飛去，我計劃五年後，40歲之前。」問他與女友是否已有共識？他稱：「都係㗎。」
對於女友LisaS.日前的言論似乎流露了一顆恨嫁的心，吳彥祖就謂：「佢冇咁講過，大家知𠵱家好忙，除非係為咗生仔女。」
情人節將至，問兩人將如何度過？吳彥祖稱大家早於兩、三年前已決定不會刻意慶祝情人節，他說：「我哋唔會買禮物畀對方，咁會搞到兩邊好大壓力，因為我哋會喺聖誕同生日互相送禮物，如果情人節嗰日大家冇嘢做就會一齊食飯。」那麼會否親自下廚𠱁女友？他說：「都會㗎，佢好鍾意食我煮嘅羊扒。」
朱茵獨過情人節
前晚朱茵與好姊妹陳法蓉、蔡少芬等出席首映，未見男友黃貫中（Paul）影蹤。問朱茵計劃如何慶祝情人節？她笑道：「情人唔喺香港，因為葉世榮會喺內地開concert，阿Paul要去support。我都有諗過跟埋佢去，不過怕佢分心，我叫阿Paul去，因為一生人有幾多個咁friend嘅朋友吖？」
採訪：駱華齡
攝影：陳順禎
