最近，有標榜大學生炒輪賺錢嘅報道，引嚟社會各界反感。喺《香港討論區》，網友普遍認為炒輪雖然可以賺大錢，不過風險就非常高，如果借政府嘅學生貸款嚟炒輪，分分鐘連交學費嘅錢都輸埋，勸喻大學生應該專心讀書，千祈唔好沉迷炒輪而荒廢學業，更建議訪問炒燶窩輪嘅大學生，作為負面教材。
網友輪王之王話：「叫人炒輪，害死大學生，多多都唔夠輸。」winvl表示：「大學生係可以冒高風險，但如果用貸款，或者問家人借錢炒輪，輸咗就累己累人；而且沉迷賺快錢，甚至連人生嘅意義都扭曲埋。」
一鋪足以清袋
網友一霧銀笑言：「畀你贏一百次都冇用，因為輸一鋪就足以令你清袋。有本事買足一世，股神就聽過，輪神就從未聽過喎。」
早前港股暢旺，炒輪賺大錢唔難發生，但萬一市況逆轉，就好容易輸晒副身家。網友霧裏看花稱：「牛市贏少少就咁囂張，大市只要一轉，包你輸凸。」