面，係人哋畀嘅；架呢，往往係自己拎嚟丟！好似油魚首富咁，永遠都以為只有佢自己先至係對的，成日為旗下諸瓣業務多多辯駁，對住傳媒係咁，去到立法會又係咁，結果咪就係落得俾人「寸」嘅下場囉！
好似噚日立法會傾電訊頻譜檢討咁，班營運商自然趁機「啄」住政府，點解呢頭未做完檢討，嗰頭就話發CDMA2000牌（第5個3G牌），個個打開門做生意，要捍衞自身利益，梗有反對聲音，咁當年第一個推出CDMA之後，又俾政府收番個牌嘅和記又點睇呢？
新舊制式 不可同日而語
和記嘅代表律師話，和記一向都有提供IS95B制式CDMA服務，𠵱家照顧班美國同埋中國遊客都仲妥妥當當，冇聽過有人話佢哋啲服務冇用同唔得──潛台詞即係話：政府唔應該收番我個牌，同埋再發新制式嘅CDMA牌！
官府點回應？負責「答辯」嘅工商科技局常任秘書長何宣威話：「香港技術發展有個隱憂，係有小小落後……」至於和記嘅CDMA，佢話「𠵱家講緊3G，香港用緊嘅CDMA確實係全球第一個推出，時為1993、94年左右，但咁耐嚟講係冇提升過，而IS95B制式係第一代，同CDMA2000不可同日而語……」潛台詞即係話：你和記啲CDMA已經out咗啦，仲撐！
咁官府到底應唔應該發第5個3G牌呢？猶如工商局「散打王」、「片」任何題目都輕易擊到對手嘅何常秘話：「CDMA2000係講緊同國內國際接軌，內地相信今年都發3G，會有CDMA……係咪要CDMA2000，其實係大家對市場飽和嘅唔同睇法，如果推出頻譜佢哋覺得有可為，咪投標囉，好過我哋響度猜測市場有幾多個operator先係夠……」see！官，係應該咁樣㗎！
[email protected]