東方電機（1072）本周一復牌急升42%後，噚日再升10%，簡直技驚四座。東機宣布將向母公司東方電氣集團收購東方鍋爐股改後68.05%股權和東方汽輪機100%股權，上述收購將令東方電氣集團通過東方電機實現A+H兩地整體上市。
有東機做樣板，現在「整體上市」4個字頓成國內同本港重大炒作主題，當中以廣州廣船（317）及中國鋁業（2600）呼聲最高。廣船母公司係中船集團，為全球第2大造船商，並正高速增長，定單接至2010年，較早前宣布注入幾項資產予上海A股上市的滬東重機（600150.SS），其中外高橋造船連寶鋼及上海電氣嘅小量股權都注入埋。
市場相信注資係為咗實現中船整體上市，因此滬東重機連續6個交易日漲停板，第7日即係噚日續升4%，短短個零星期升逾1倍。由於中船規模實在太大，靠一間滬東重機肯定食唔晒所有資產，故此另一間子公司廣船肯定有得諗，注資係遲早嘅事。事實上中國目標未來10年超日趕韓成為全球最大造船基地，大把世界。
至於中鋁，上月通過S蘭鋁及S山東鋁股改及合併議案後，現正進入全力搞緊透過發行A股作整體上市。較早前中鋁宣布調高氧化鋁價格50%，券商發表報告只圍繞鋁價升勢是否持久，好明顯被轉移了視線，焦點肯定係下個月嘅A股上市安排。
澳科獲瑞信入股
上星期講過隻前稱偉誠嘅香煙包裝生產商澳科（2300）前大股東兼主席慢慢淡出，上星期減持80球貨之交易，股權變動上周只係顯示李偉波減持，到噚日證實咗由瑞信喺1月31日以4.969元接咗20球貨，作價同李氏沽出價一樣，咁另60球去咗邊？值得細味。大股東澳洲上市公司Amcor同時披露，喺2月1日喺街外增持咗7.83球貨，開始有基金肯露面持逾5%，澳科要昅實。
歐陽風