胡杏兒由肥杏變回苗條靚女後，近日忙於拍攝無綫新劇《歲月風雲》，但日前她與林峯在銅鑼灣鬧市拍攝一幕情侶逛街戲時，竟被途人誤認是楊怡，還大讚她真人十分靚女。看來肥田形象已深烙觀眾心中。
胡杏兒、佘詩曼、林峯和伍衞國日前現身銅鑼灣鬧巿，拍攝無綫新劇《歲月風雲》，四人分成兩對拍攝，吸引近百名途人圍觀，場面熱鬧。近日被指拍劇經常遲到的林峯，當日與胡杏兒拍攝一場拍拖戲，但站在路邊的途人卻指指點點，有人竟指着胡杏兒大讚說：「楊怡真人又幾後生，幾上鏡喎。」雖然被讚漂亮，但遭錯認是其他女藝人，不知杏兒是喜是愁。
大汗淋漓
由於拍攝當日天氣回暖不少，NG數次後，林峯和胡杏兒都大汗淋漓，貪靚的林峯即示意工作人員遞面油紙巾給他，身邊的胡杏兒見狀，也不執輸地齊齊站在街上印面油。
至於伍衞國和佘詩曼則拍攝坐在開篷勞斯萊斯上遊車河的戲份，現場有不少師奶fans拿出手機拍攝伍衞國，又大讚他年輕及保養得宜。
趁機購物
由於太陽頗猛，佘詩曼在休息空檔時醒目地走入附近的商店歎冷氣，又爭取時間逛時裝店，她一邊看貨架上的新裝一邊說：「我一拍劇就冇時間去shopping，所以呢啲空檔我好鍾意喺就近店舖行吓，睇吓有冇收穫。」問到阿佘是否與伍衞國扮演情侶時，她說：「唔係，我哋有生意來往，所以今日呢場戲講我哋一齊坐車傾嘢。」
採訪、攝影：比華利
