上海B股大幅反彈，帶番起A股，之不過H股就冇乜反應，國內股市雖然反彈，但人大副委員長成思危再講嘢，勸國內股民唔好咁貪，呢排已經有好多風吹緊，話針對股市嘅宏調措施陸續有來，國內股市向來最大嘅風險就係「政策風險」，炒緊H股嘅股民梗係唔會當呢啲係耳邊風，H股冇乜大變動並唔出奇。
國內炒股向來重視人脈關係，收風炒股，啲風吹得咁勁，應該都會有啲嘢跟尾，唔好忘記恒指裏面越嚟越多H股，小心殃及池魚。
當然，從技術走勢嚟睇，港股昨日升199點，成個勢都係偏好，不過，成交仲係細，股民入市嘅態度都好審慎。帶起個市嘅股份係中移動（941），升3%，高收75.75元，睇個勢今朝早仲有得去，揸咗中移動C輪嘅唔使咁快食糊，下個阻力位喺77.50元，升到呢個價先諗。
美國布殊總統前晚拋咗份預算案出嚟，話要加軍費，有投資者憧憬油價會升，又睇好啲商品價格。呢個世界嘅嘢邊有咁簡單，好少嘢係單一因果關係嘅，況且國會已經唔係共和黨話事，睇油價同商品價格，都係睇番經濟同通脹實際啲，至於短線走勢，就要多啲留意圖表，金價嘅走勢就要留意埋美元滙價。
中鋁C輪1272：中鋁（2600）昨收7.82元，升幅雖然唔算大，但係「破旗」嘅形態就好吸引，今日如果有大成交配合炒上，可以推向8.30元嗰頭，破位就睇8.70元。
中鋁C輪1272昨收1.44元，槓桿率5.4倍（有效4.3倍），對沖值0.82，正股升上8.30元，1272應該喺1.85元樓上，正股升上8.70元，隻輪會見2.20元樓上，正股跌穿7.55元止蝕。
俊樺