呢3個月泰國央行一系列措施出台，不斷打壓泰銖滙率，打擊外資引入泰國。首先喺舊年12月實施外資管制，用外幣買泰銖，其中30巴仙要存款喺泰國至少一年，結果即日收效，泰銖急瀉22%。第二日又話股票有免死金牌，不過股市都跌14.8個巴仙。
到咗1月，又管制外資在泰企業持股要低於49%。上月底，仲禁埋當地商業銀行參與泰銖離岸不交收遠期合約。唔只泰國個市唔多掂，仲拖累亞洲股市，港股都俾佢跣過一次。
噚日泰國嘅傳媒集團Nation總裁帕納（PanaJanviroj）在港演講，講吓泰國政治對經濟影響。佢話，之前泰國央行不斷有措施出台，打壓成個泰國經濟，搞到鬼咁亂，佢認為，下個月應該唔會再有呢啲咁高招嘅外資管制出現。到咗6月，泰府仲應該會修改憲法，民眾有望喺10月時，早過香港見到民主選舉，佢諗到時新政府上場，點都會吸取今次寶貴嘅教訓，唔會再亂咁推新措施出台，就算有，新政府都會諗過度過，問吓專家意見，費事又拖累經濟。
[email protected]