中國隊以往畀人欺善怕惡嘅形象，一對住歐洲球隊就馴過隻貓；不過周一國奧隊0:1輸畀英超勁旅車路士青年軍場波，就突然發惡，全場踢到飛腳又起踭，就似乎冇品咗啲。
今場係國奧隊歐洲集訓第9場波，喺之前8場波嘅成績3勝4和1負，不過就攞到兩張紅牌。而呢場對車仔青年軍喺賓福特球場舉行，國奧隊亦再次發揮茅王本色，飛鏟對方球員唔收腳，結果兩次出現雙方推撞嘅混亂鏡頭。最後車仔憑上半場入波擊敗國奧隊。
我求大俠覺得呢支國奧隊球場脾氣咁大，一嚟同內地「一孩政策」有關，咁大個仔都未被阿爸阿媽打過，漸漸養成少爺脾氣；加上中國人民近年自信心大增，簡直唔放鬼佬喺眼內，結果呢次歐洲集訓咪不時發揮清末嘅「義和拳」精神囉！
不過中國球迷亦有責任，據內地傳媒講有成6,000名中國球迷入場睇呢場波；但係坐低冇耐就同車仔球迷發生罵戰，英式粗口對北京粗口，國奧球員聽到仲唔上腦，咬實牙根同鬼仔死過咩！
賽後好多內地球迷批評國奧「屎波夾冇品」，我求大俠都好認同！因為球員發脾氣又輸波，證明有火之餘，天份亦好似差些少。嗱！國奧隊今個月18日同20日會來香港打賀歲波，各位球迷不妨入場感受吓佢哋嘅青春怒火啦！
「唔係人人都特別有踢波天份，不過最緊要係有火。當然，點將火轉化為動力，就要睇環境、教練、球迷嘅質素，希望國奧隊明天會更好喇！」