香港豪宅不時都有天價成交，而一直想同香港競爭嘅新加坡，一樣不乏呢類創新高買賣，買家甚至連樓書都未睇過就入市。
香港興業喺新加坡那森路嘅豪宅盤BeaufortonNassim，最近有個單位以實用面積呎價3200蚊坡紙賣咗，係當地已知嘅新高價，維起港銀萬六蚊一呎，直迫香港豪宅價。個單位實用面積1851方呎，三套房連化妝間，有特長客飯廳，望泳池景，另外，客廳有個50呎露台同一個三面用雙層玻璃密封，可作工作間嘅地方，叫做「珠寶盒」。
朋友出面律師代辦
香港興業集團助理總經理史慕蘭話，買家係東歐客，透過朋友攞咗啲資料，拍板後就搵律師嚟簽約，自己從未現身，夠晒神秘。
據聞買家不時會去新加坡做生意，所以買個單位做「行宮」。
BeaufortonNassim總共有5幢4層高豪宅，夾埋得30伙，實用面積1238至3692方呎，兩房至四房複式設計。設施有泳池、健身室同燒烤場等；預期08年落成。
冇備樓書照賣10間
聽史慕蘭講，上個禮拜六原本諗住招待貴賓做軟銷工作，所以冇預備樓書，點知反應熱烈，話咁快去咗10間，實用面積計呎價2300至3200蚊坡紙。其中有一個海外買家仲一口氣掃咗1幢共4伙，畀一家大細住。既然個盤咁好賣，史慕蘭透露，過完農曆年正式開售時會加少少價，約莫3至5%。
點解個盤咁好賣，皆因位置喺豪宅地段，連新加坡內閣資政李光耀都住喺呢區，肯定買得過啦。況且單位擁有永久業權，自然又比99年期物業值錢好多；難怪啲客唔使睇樓書已經搶住買啦。可見新加坡樓市同香港真係不相伯仲。
[email protected]