做藝人嘅辛苦唔係普通人體會到，蒙嘉慧（YoYo）噚日為咗拍無綫新劇《爸爸閉翳》，喺汀九某豪宅拍落水戲。
游到腳軟
劇情講YoYo着住衫褲跳落泳池游水，拍嗰陣又遇着整蠱王歐陽震華（Bobby）刻意拖時間，搞到原先幾分鐘就拍完嘅落水戲，拍咗成20分鐘。
YoYo話喺屋企已經嘗試用凍水沖涼，但拍攝時一樣凍到震，鬼馬嘅Bobby見到YoYo凍到全身僵硬，依然整蠱對方，喺YoYo落咗水等佢埋位嘅時候，佢又同導演講話要去廁所，又攞YoYo放喺池邊嘅私家高踭鞋嚟裝水，不停講笑，遲遲都唔認真拍，搞到YoYo浸咗十幾分鐘都未有得上水。
YoYo凍到唔停咁震，又游到腳軟，要攬住個水泡借力，Bobby仲好得戚咁取笑佢凍到凸點，完全唔擔心鄭伊健會搵佢找晦氣。YoYo忍唔住用水潑佢，又咬牙切齒話「好熱」，又講笑叫導演遲啲拍Bobby俾人潑水嘅戲份，換上鏹水代替。
