內地銀行業去年底全面開放，面對老外銀行加入分一杯羮，大家都對HighEnd市場虎視眈眈，土炮銀行亦不甘示弱，紮晒馬出招迎戰，好似喺祖國擁有最多白金卡卡種嘅中信銀行，聽日喺上海搞個「白金之夜」新年音樂會，主要係回饋白金卡嘅貴賓，實行留住知音客。
今次「白金之夜」音樂會戲碼不弱，搵嚟著名年輕指揮家李心草，夥拍中國交響樂團演出，相當落本。銀行預留體育盛事、音樂會、高爾夫球場畀重要客戶呢個做法，喺祖國並唔常見，但喺競爭下都要面對現實，諗諗計討客戶歡心，「做又三十六，唔做又三十六」嘅時代已經過去。
[email protected]