銀行業競爭激烈，併購之聲此起彼落。咪以為呢類消息只有業界、財團同股票投資者先會關注，原來外國好多小存戶揀選銀行理財時，都會考慮呢個因素。
網民rridgeley認為搵間大型國家銀行處理私人財務最穩陣，「之前用開嗰啲地方銀行，唔夠幾年就俾大行吞併，銀行戶口冧巴又要改，做開嘅自動轉賬、自動繳費戶口又要重新整理，真係諗起都頭痛。」
嫌唔夠人性化
但SCOEWS就覺得，如果做生意嘅話，同地方銀行合作可能會好啲，「地方銀行較人性化，更了解你嘅需要，彼此容易建立長遠嘅夥伴關係。」
gracerenshaw亦認同地方銀行會較體貼客戶，「𠵱家用緊嗰間銀行，喺我阿爸嘅年代已經開始幫襯，地區分行經理年年都會跟進有冇服務需要提供，不過正如啲網友講，銀行業成日都有併購潮，都唔知幾時會輪到佢㗎﹗」
RogerTheriault就好抵死咁話：「大行又好、細行又好，總之夠晒方便就係最好。至於方便嘅定義就係──超市內必有該行提款機，最好係分行星期日都開門，以前好多地方銀行都可以做到呢點，不過最後都被大型銀行收購咗。至於網上銀行嘛，其實𠵱家好多銀行都有呢方面嘅服務，使乜刻意搵間齋網上銀行呢！」
《華爾街日報》網站較早前進行一項網上民意調查，邀請網友喺大型國家銀行、地方銀行同網上銀行中，揀選最喜歡選用嘅銀行類型。結果發現，喺網上投票嘅3300人中，鍾意用國家銀行同地方銀行嘅各佔38%，只有24%揀純網上銀行。