與老友記到「福臨門」飲茶，食到好飽，拜拜之後，唔想即刻搭的士返中環，於是行吓街先，當作步行運動可也。行咗唔夠一分鐘，便見「天地圖書」，心念一動，好耐冇行過書局咯，於是走落樓梯，睇吓有乜新書㖭。書架上有「本周暢銷書榜」，凡二十本，睇真啲，有一半以上係自己的相識/朋友寫嘅，全部係炒股致富，股海淘金，如何做基金經理之類。香港買書人果然夠現實，唔怪得前一排有人叫左丁山出書啦。自問唔識教人發達，唔識如何點石成金，都係咪搞咯。
講到出書，陶傑原來出咗十幾二十本，令人目不暇給，相信絕大部分係來自「黃金冒險號」，文章就寫得非常好嘞，但世情如此，好書未能上暢銷榜，只望細水長流，長賣長有。入到書店，不會空手而回，一張大牛加多少，換回兩袋書籍，麻煩係返到屋企之後，唔知擺去邊，有排俾老婆哦。月前睇電視，見一位校友出現在畫面上，介紹佢嘅上海別墅，令左丁山不斷吞口水，呢位校友去咗上海十幾年，現在開家俬舖，老早買咗別墅長住，不再回港。如果有間咁嘅屋，左丁山會再買多幾百袋書。我哋在香港為間屋做牛做馬，屋內空間寶貴，當衣服都唔夠地方擺時，何以藏書？想吓想吓，營碌半生，書房都搵唔到一個，不禁悲從中來！
返到屋企，打開新買返嚟嘅《余光中詩選》（1949-1981）及（1982-1998），第二卷第六十四頁「老來無情」，講告別香港，詩有云：
「老來無情，料不到行期日近
告別香港竟如此地艱辛
一草一木為何都不勝其眷眷？……
……便此結束了麼，我的沙田時期……」
第六十七頁「別香港」詩云：
「如果離別是一把快刀
青鋒一閃而過
就將我剖了吧，剖成兩段呼痛的斷藕
一段，叫從此
一段，叫從前
斷不了的一條絲在中間
就牽成渺渺的水平線
一頭牽著你的山
一頭牽著我的眼
一頭牽著你的樓
一頭牽著我的愁。」
好彩自己冇移民經驗啫，否則，移民上機之時，讀此兩首詩，肯定淚濕青衫。