左丁山少時候夢想做文藝青年，後來知道自己完全唔係嗰皮，即刻打退堂鼓；嗰陣時好想寫新詩，以余光中、囗囗二人為偶像。記得好耐之前，讀過余光中一首寫污染嘅詩，覺得直情係最好嘅反污染戰歌。又一城開幕之時（十二三年前），到又一城一間大書局問：「有冇余光中詩集？」年青店員答：「余光中？」諗咗一輪，叫左丁山行去文藝書嗰邊，唉，有冰心、有巴金等等，就係冇余光中，氣結而去。
呢次去「天地圖書」，碰到一位年紀大嘅店員，於是問佢：「有冇余光中詩集？」店員立即答：「有，呢邊一格書架全部係余光中作品。」真好服務，於是買咗三本，喺《余光中詩選》第二卷（1982-1998），第八十五頁搵番嗰首反污染詩篇出嚟，開心到極，環保人士應該讀完又讀，背到熟，可以隨口讀出嚟。詩題：《控訴一枝煙囱》：
「用那樣蠻不講理的姿態
翹向南部明媚的天空
一口又一口，肆無忌憚
對著原是純潔的風景
像一個流氓對著女童
噴吐你滿肚子不堪的髒話……
……風在哮喘，樹在咳嗽……
而你這毒癮深重的大煙客啊
仍那樣目中無人，不肯罷手
還隨意撣著煙屑，把整個城市
當做你私有的一隻煙灰碟……
看不見，那許多矇矇的眼瞳
正絕望地仰向
連風箏都透不過氣來的灰空。」
此詩寫於一九八六年高雄，如果余詩人今日仍然居於沙田中文大學教授宿舍，望吐露港睇唔見八仙嶺，到中環購物碰上空氣污染指數一百三十五（一月三十日），相信余詩人會寫出一首感觸更深嘅反污染詩。今日香港灰霾滿佈不見藍天，讀余光中詩特別感慨，希望曾先生梁先生買本詩集讀吓，無論邊位做特首都好，別讓香港人絕望地仰向連風箏都透不過氣來的灰空。