陳伯：Hi，成議員，噚日有無睇新聞啊？錦繡花園為咗開唔開條路，班業主同隔籬啲村民差唔多大打出手。唉，成議員你都知我退休靠收租過活㗎啦，我仲有個單位喺錦繡，𠵱家都唔知會唔會搞到樓價跌㖭呀！
成議員：陳伯，無問題喎！有我成議員出手，實同你成功爭取開番條路。
陳伯：乜嘢開番條路？條錦繡大道根本就係私家路，由興建到維修，我哋班小業主都有份夾錢，之不過政府當年諗埋啲縮數，喺批地嗰陣寫明條私家路就要我哋畀錢，但用呢，就要畀全世界用，你話幾咁唔公道！
成議員：𠵱，聽落又係幾無陰功喎！不過好似喺新界，政府四周圍都搞啲咁嘅縮骨路，咁𠵱家政府咪開多條路車行囉，仲乜鬼又勞嘈啊？
陳伯：唉，開多條路有乜用，都話啲官唔用腦，乜嘢叫專員調停，叫運輸署設計，嗰條新開嘅錦壆路，要兜大圈，班司機大佬睬你都儍，咪又係行番錦繡大道，根本就無解決到問題，上個禮拜仲撞死咗個細路，如果啲路唔係俾啲官咁樣搞法，又點會出事呀！班官就當咁樣係做咗嘢，當交功課。
成議員：係囉，係囉，一於搞抗爭，再唔係就告政府！
陳伯：抗爭咗幾年，政府有無聽先得㗎，班業主一早就告上法庭，要求唔畀七米以上長嘅車駛入錦繡大道，之不過排期排到十月先打之嘛。政府把口講和諧，官司都未打就硬係要開路，又繼續畀大車入錦繡大道，擺明怕咗嗰班貨車場主，佢哋攞啲新界田地泊貨車，又唔見啲阿Sir去管吓。
成議員：陳伯，唔好話啲官吖，我哋做議員嘅，唔幫新移民申請公屋都會俾人攞幾萬蚊去買兇伏擊啦，雖然話信不信由你，但做官嘅都係向惡勢力低頭㗎啦！
《街坊Hi你》歡迎讀者及各界社會人士分享地區事務個案，本欄將盡力向有關政府部門跟進。聯絡電郵︰[email protected]