「我求大俠大約喺70幾分鐘，已經見到伊度奧同教練列卡特喺後備席係咁傾，點知搞到完場前先落場，作為球迷梗係失望啦！究竟傾咩傾咁耐呀？」
「波係圓」呢句說話幾時都啱用，好似周日夜場啲波真係越追強隊越死，由西甲聯開始數起16場開14「細」外，頭場西維爾竟主場賽和皇家蘇斯達0:0，晏啲嘅皇馬仲要主場輸畀利雲特0:1，再到子夜場嘅巴塞作客奧沙辛拿又係打成0:0失分，西甲強隊同日輸盤收場，仲唔叫做「波係圓」？
里昂皇馬爆冷輸波
西維爾1.3倍W開唔到，算數；轉玩法甲里昂1.5倍W先，點知又作客0:1不敵特魯瓦，歇冬後4場聯賽輸足3場，仲要4次輸盤。唔信邪夜場再吼名牌皇馬同巴塞隆拿，結果又係失望而回，成晚冷到飛起，點賭？
講番皇馬場波，就算魯爾、雷恩斯同古廸傷癒復出都幫唔到手，仲要輸球12碼畀利雲特，結果0:1輸埋開個9倍大冷客W。最好笑係幫利雲特博12碼嗰位仁兄，正係之前喺意甲羅馬跟過卡比路嘅中場湯馬斯，唔知呢位現任皇馬教頭重遇舊部屬兼愛將，開心定谷氣？最慘今場雷恩斯同羅賓奴一齊傷出，皇馬輸波仲要損兵折將，唉……
巴塞嗰邊又係冇乜攻勢結果賽和奧沙辛拿，焦點係養傷幾個月嘅伊度奧喺完場前復出，不過好似冇掂過波囉。