國際衞生波，夢幻對決：法國對阿根廷，相信唔少球迷期待已久，自從1986年世界盃之後，足足20年之後，佢哋先有機會再約呢場衞生波！約咗20年先成事，踢場波唧，有冇咁難約呀？
講返場波，兩隊自從世界盃之後，法國隊同阿根廷一樣都進行換血！正確啲講，世界盃期間，以及歐洲國家盃外圍賽，大家都已經開始睇法國隊嘅比賽，睇到一啲有實力嘅新面孔，例如馬隆達、列貝利。當然，最期待係杜明尼治起用大量里昂球員，法國隊回歸4-4-2、4-5-1兩翼進攻，睇下係咪真係咁有睇頭！
至於阿根廷，球員陣中，大多來自西甲球隊，包括華倫、維拉利爾、薩拉戈薩……前鋒級數，我純個人感覺，認為仲好過法國，包括巴塞呢期fit到漏嘅沙維奧拿、加埋越踢越好嘅馬體會新丁阿古路，仲有目前西甲射手榜排第2位嘅薩拉戈薩前鋒廸亞高米列圖！不過，阿根廷比我嘅印象係雷聲大、雨點小，強陣出戰、不過輸波而回，希望今次有改善啦！
周鵬
商業1台《球迷集中贏》主持
電郵：[email protected]