以前歌神阿Sam有首名曲《加價熱潮》，劈頭兩句係：「你怕我怕個個怕，煙加酒加屋租加……」唱咗幾十年，到今時今日仍然都係咁一針見血講出小市民嘅心聲。儀義兒喺佢嘅Blog《Twilight．電車男的曙光》入面，以「小商舖．大業主．地產商．政府．財政預算」為題，利用一張「攝於屋企附近小商場」嘅紅紙告示，道出一則城中小故事，揭示所謂「經濟好」嘅真實一面。
儀義兒仲引述以下一段對話同感想──
老闆：「辛苦經營十幾年。九七、九一一、沙士都能捱過，卻敵不過業主的瘋狂加租。」
香港地，很多地產商、業主都只賣樓不賣舖，甲級寫字樓月租更是天價……更不用說小商舖；收入已經微薄，那怕加一成，半成都夠你全家唔富貴！現今，香港競爭力每況愈下，當然歸功於地產商及大業主。
當我哋特首聲稱經濟暢旺、百業復興時，誰是最大得益者？當然係地產商。誰是既得利益者？政府！
領匯加入打壓大軍
如何還富於民，且看2月28日的財政預算案。
做五金小生意嘅舖位都要面對加租壓力，大街大巷大商場嘅舖位租客就更加頭痕，以新地（016）嘅商場為例，舊年同今年續租嘅租金加幅，由15到40%都有；至於旗艦級商場觀塘apm，新地代理租務部總經理馮秀炎話，續租租金加幅20至30%，呎租已經去到90至300蚊。另外，早排美聯物業預期，農曆新年後核心區商舖租金，上半年起碼升多5至10%；即使二線舖，都有2至3%升幅。
如果經濟真係好，舖頭生意多，畀多啲租金有幾咁閒？最弊係未享美果先嚐苦果。帕拉汀更將個話題引伸去領匯（823）：「我對這話題很有感觸。華資地產商一向食人不吐骨，寧可丟空個商場一年，等引入大型連鎖店；最慘是一向做小商戶生意的領匯，𠵱家都慢慢變成這樣，剛剛不和酒樓續約，看來它日後都會越變越麻木。」
儀義兒話：「無計。領匯已為一間私營機構，大有藉口以維護股東權益，拒絕與小租戶續租。近來經過一些領匯商場，驚覺裝修得像私人大型商場一樣。」
相信唔止租舖嘅人，好多小市民都會有一個感覺，就好似阿Sam話齋：「夠嘞啩，夠嘞啩，咪枕住加，喂好嘞啩！」