英國維珍集團老闆布蘭信可謂百足咁多爪，業務瓣數多籮籮，更進軍太空旅遊市場。佢旗下嘅「太空船二號」（Spaceship2）預計2009年首航，每位承惠20萬美元（約156萬港元），對富豪只係九牛一毛，但有唔少人嫌貴。
AlanB喺《MSNBC討論區》話，美國「太空冒險」（SpaceAdventures）公司亦推出太空遊服務，收費每人2500萬美元（約1.95億港元）。佢問：「喺太空飛3個鐘頭就要嘥咁多錢，究竟值唔值得？」
Chanleyg61講，一般航空公司機票大約係每1000哩收費1800美元，即每哩1.8美元左右；以太空離地球約13哩計，要畀成2500萬美元先可上太空，即係每飛1哩就要192萬美元，似乎有掠水成份。martyphoto即時彈出嚟更正，話太空其實離地球62哩，即係每哩40.3萬美元至啱。
有錢都要體能過關
不過，Teleon話如果佢係百萬富翁，會試吓搭太空船嘅滋味。Darchamp就反駁：「唔係有錢就可以上太空，因為仲要通過嚴格嘅體能培訓，相信嗰啲40幾歲嘅億萬富豪會頂唔順，自動放棄。」
布蘭信話：「20萬美元嘅太空團費係貴咗啲，但亦有好多人肯畀錢一試，我希望能夠載幾百萬人上太空。」據悉，現時起碼有200位旅客落咗定。