正所謂「八仙過海，各師各法」，每個人都有自己嘅投資方法，好似有啲人鍾意短炒，追求以最短嘅時間，賺最多嘅錢；有啲人就鍾意揀隻好股長揸，以最低嘅成本，換最高嘅回報。喺《XocatII討論區》就有一大班諗住長揸中國交通建設（1800）嘅投資者，開咗個「中交打氣區」，幫股價打打氣。
招股價買賺近倍
打氣區發起人herry2046開宗明義咁話：「（持）有中交就入嚟打打氣！Go！Go！Go！」佢嘅肉緊程度，真係令人以為佢係大股東！網友B4321就答嘴：「我有21000股（21手），用招股價買嘅。」嘩！用招股價4.6元計，噚日中交收9.27元，B4321兄咪賺咗成9.8萬銀！
herry2046跟住就上嚟披露權益，「招股時我抽到兩手（2000股），喺9.35元加注，長線睇好！」真係想封佢做中交天字第一號「粉絲」。網友mmr.ren就唔係好認同herry2046嘅做法，「成9.35你都去追，真好嘢，祝你賺多啲啦！」大大粒酸葡萄咁掟落去，真係無乜風度，不過話時話，係要有人睇好同睇淡，先至有成交嘅，唔係邊得嚟有貨俾人買賣！
花旗睇升$11.81
咁大行又點睇呢？美資花旗月頭就出咗個report，話睇好中交日後毛利率會改善！點解？好簡單啫，咪係由國企變為上市公司呢個簡單原因囉！
花旗仲估中交喺05至08年，每年盈利複合增長幅度有成40%𠻹！佢個目標價仲勁，估中交會喺12個月內升穿10元，去到11.81元，即係仲有27.4%水位；投資評級就當然係「買入」啦！
各位已買入或者想增持中交嘅「粉絲」，自己睇價做嘢喇！