阿爸鍾意飲中國茶，尤其是普洱，貪茶味夠濃。阿媽就鍾意食煙熏菜式，最愛食煙熏雞。成日都好想搵一道菜，可以一次過滿足他們的要求。終於被我搵到嚼江南推出的茶熏雞，茶中有雞，雞中有茶。
記者：梁學文
攝影：楊錦文 Model:Kannis
首次用茶葉煮雞
平時茶葉蛋同醬茶鴨就食得多，茶熏雞就未曾試過。今次上海菜館嚼江南就推出茶熏雞，大廚陳師傅話：「平日好多時都係用龍井茶葉做蝦仁或者煮鴨，煮呢個雞都係第一次，我哋都試咗好多個唔同嘅方法同配搭。開頭諗住用做茶葉蛋嘅方法浸雞，但係點都唔好味，得個皮有啲茶味，雞入面無味，最後試用熏的效果好好。」
最緊要平衡
茶熏雞主要用3種不同的茶葉來做，最重要是當中的比例，陳師傅話不是款款茶葉都適合做熏雞，他說：「我哋用香片、普洱同玫瑰花茶做熏雞，比例上香片就會重手啲，普洱就輕啲，主要都係以茶香味為主。試過加多咗普洱，熏雞即刻變得好苦，而且入口帶酸，唔好食。所以呢個菜最講究係茶葉嘅平衡。」不要以為所有茶葉都可以吃，原來只得龍井是可以放入口食用，其他的茶葉只適合在調味的時候使用。
（上）玫瑰花茶，為雞肉增添了一陣花香，入口時刺激食慾。
（左）香片茶葉，令雞肉上枱時散發清香的茶香味。
（右）普洱茶葉，令雞肉食落有茶味，達致茶雞合一。
御品茶皇熏雞 原價$218
推廣價$168全隻/$88半隻
茶熏雞主要用香片、普洱同玫瑰花茶做，師傅先用醬汁將雞浸熟，然後就加入茶葉一齊熏，令雞由外而內都有茶葉味。熏雞入口非常鮮滑，然後一陣煙熏味慢慢滲出，普洱味道比較突出。陳師傅教路，吃的時候連些少汁一齊食，就最能夠食出茶熏雞的味道。
手抓羊 $98
別以為手抓羊上面有幾隻紅辣椒就好辣，其實入口只有微辣，反而蒜茸和薑汁味比較重。加入了蒜茸和薑汁，令羊肉少了一陣濃烈的羊羶味，不過就保留了羊肉的鮮味。最好用手抓住食，更加原汁原味。
雨花湯圓 $20
湯圓做成雨花石的顏色，所以叫做雨花湯圓。湯圓的顏色除了來自花生同芝麻兩種餡料之外，師傅還加入朱古力粉搓皮，令顏色更靚。湯圓入口有些少朱古力味，再加上桂花酒釀甜湯，味道特別。唯一的缺點就是略嫌湯圓過甜。
鮮茄魚湯鮮魚球 $98
桂花魚肉質鮮甜，再加上番茄的新鮮清新感覺，雙倍清甜。桂花魚起肉之後再加入蛋白，令魚肉更滑溜。無論冬天夏天，這個魚湯都同樣有開胃的效果。
水煎包 $20（3隻）
一般生煎包就只會煎單一面，而水煎包就煎足兩面，香脆口感亦加倍，而且在差不多煮熟的時候，加入粉漿再煎，令包面有多一層脆皮，3個脆！
食神評分（5個★為滿分）
食物★★★★
價錢★★★★
服務★★★
環境★★★
讚：茶熏雞夠創意！
彈：菜館位置不夠方便，離地鐵站頗遠。
睇路搵食
嚼江南（26280299）
地址：荃灣青山公路388號中國染廠大廈地下G05
營業時間：11am-12mn