曾蔭權這個番書仔中英文流利，比老董的蹩腳廣東話順耳，不過連任的口號「我會做好呢份工」，聽落唔夠power，嗒落無point，似翻炒毅進和展翅計劃畢業生出路的宣傳口語。雖然可以辯稱，這是刻意帶點「童言」，摻點沙石，無咁老餅，可以跟後生仔拉近距離，將六字頭的曾公走近年紀小他一半的年青中產。
曾家班以「我會做好呢份工」，大打打工仔牌，打工仔服不服氣認同，曾蔭權就闊佬懶理了。反正他打的這份job，獨一無二，再多做五年，getthejobdone，自己的政治生涯也done得九九十十，這樣的「風流工」，其他等住份糧養成頭家的打工仔無樣可學的，你以為welldone，老闆卻決定燉你，唔該你腳痛就執包袱返屋企。
特首自稱打工，幫邊個打工呢？市民千祈咪「福為民開」，認真對號入座。發吓夢咁諗，假如你是老闆，面試時請唔請發誓「我會做好呢份工」的曾蔭權？若然請個跑腿信差，負責人肉專遞上京的，曾公done夠有餘了。搵個打好份工心態的CEO，就會嫌他熱情不足。所謂受人錢財，鞠躬盡瘁，死而後已，朱鎔基大佬做人辦，曾公不妨自創廣東話增訂版本：「老闆，我辦事，請你放心；四四六六，我死都會死掂佢！交足貨！」表情當然也交足戲，停吹口哨，嚴肅對待這份job，唔係joke；讓老闆安心，你這個廚房小工不會將香港煮個全熟，完蛋。