好佩服整齋嘅人創意無限！齋鴨、齋雞、齋鵝，形神口感俱似，有「肉」連皮！最近於九龍城新開張嘅皇悅，再向難度挑戰，整出齋Cake，唔落蛋唔用奶，竟然做出鬆軟幼滑口感！唔明難度喺邊？咁你試吓用無落蛋嘅麵粉，整出嚟嘅係白糖糕定蛋糕先？
記者：朱崇德
攝影：陳盛臣
Model：高倫
自製齋．Cake，九龍城皇悅係香港第1間！聽落好似幾新奇，台籍大廚陳師傅話：「其實齋．Cake係從日本傳入，喺台灣興咗成10年，而且仲開到一街都係專門店！」大家唔知？千祈唔好覺得自己Out。話說皇悅從台灣申請陳師傅嚟香港，足足用咗1年時間：「有關申請部門，起初都認為做餅師傅香港一街都係！點解仲要特意從台灣請人返嚟爭飯碗呢？」
大豆蛋白質代替雞蛋
又唔係切佢一忽肉，點解齋．Cake唔可以用奶、落雞蛋？「因為食齋嘅人認為，雞蛋同奶都係從動物身上所出，所以屬於動物一部份！完全守齋嘅人兩樣都唔食，不過亦有人會二擇其一唔食！」
須知打起嘅雞蛋，係令蛋糕鬆起嘅主要材料：「因為唔可以落雞蛋，所以我哋改用大豆提煉出嚟嘅蛋白質代替；至於做Cream的淡、甜忌廉，就改用植物奶油代替，效果完全一樣！」
齋．CakeVS普通蛋糕
（左）齋．Cake 植物油忌廉唔溶喺手
海綿蛋糕部份明顯較細密，食落鬆軟又滑好多！至於以植物奶油打成的鮮忌廉，發現在一般室溫情況下，竟然係唔會溶㗎！真係只溶喺口、唔溶喺手！而且食落亦冇滯口感覺；話說記者曾空肚食2件，平時食鮮忌廉一定有啲反胃，但齋．Cake感覺好清怡！$9/件
（右）普通蛋糕 質感粗糙價錢較平
普通街邊嘅黑森林蛋糕，海綿蛋糕部份有啲鬆散，感覺粗糙、好似一陣風，Cream部份太薄，完全食唔到味道，不過朱古力味好濃，價錢$3.4，比齋．Cake平好多。
全素之選
雜果生日蛋糕$96
店中最熱賣！相信好多食素嘅人都未試過蛋糕嘅滋味，做成普通的生日蛋糕，可以講成有點補償心態，鮮雜果配全素糕底及植物奶油，賣相簡單又唔Heavy。
綠茶紅豆（前）$9
咖啡椰果（後）$9
記者最愛這個綠茶紅豆，植物奶油唔Heavy，綠茶香味特別出，紅豆一粒粒，食落好突出；而個簡單嘅咖啡蛋糕加入椰果後，比一般用啫喱更有𡁻口，唔太甜，更有咖啡香。
手製鳳梨酥$8/個
$8/1粒鳳梨酥？貴咗啲喎！「好味之處在於新鮮手製！面皮特別酥脆，輕咬即碎！至於餡料用上新鮮鳳梨醬，坊間好多舖頭𠵱家用緊冬瓜茸加鳳梨味粉代替，貪佢平嘛，我哋真材實料，所以先賣咁貴。」
蛋×奶之選
草莓泡芙$18
為了做出泡芙的鬆起感覺，所以加入蛋製造（據知現時正研究冇蛋泡芙），忌廉改以植物奶油，口感清怡又唔膩口，面層撒上香口的椰絲以代糖霜，多食都唔怕肥啦！
素食益糖芝士蛋糕約$48
新出品！以植物芝士粉做成蛋糕，口感與一般芝士蛋糕無異：「台灣都有人試做，不過最難是做到濕而軟的口感！」雖然只有手掌般大，竟有半磅重，質感十足；另外還特別用「益糖」作調味，好處是食後血糖唔會上升，亦唔會影響胰島素，糖尿病人亦可食用。
路人試食有Say
三毫子
「唔落蛋唔用Cream整嘅？真係幾高招喎！我覺得齋．Cake軟啲好味啲；普通黑森林同佢比，感覺『嚡』口好多。」
Carol
「第一次聽有齋．Cake呢樣嘢！好香、唔太甜，唔講真係唔覺佢係齋囉！普通黑森林蛋糕就亁身咗啲。」
廚．私密語
齋．Cake基本由大豆蛋白質同植物奶油所製成，其實只要由台灣自己訂原材料，咁咪可以自己做齋．Cake囉？陳師傅話：「其實坊間所買到嘅『大豆蛋白質』，不論任何牌子，基本都會摻雜了麵粉、發粉及糖等，好處係一開出嚟就整好，弊處係間間份量唔同，口感亦未必好，所以要整齋．Cake，首先要明白材料的成份特性，自己再加配料混合，有時甚至要去糖減甜，真係幾專門吓！」
睇路搵食
台灣皇悅健康素食館（23828290）
地址：九龍城福佬村道39號地下
營業時間：11:00am-10:30pm
付款方式：現金或信用卡，免加一
