滙豐控股（005）證實計劃賣咗喺英國倫敦金絲雀碼頭嘅總部，總樓面面積達110萬方呎，售價高達10億英鎊，計落要成153億港銀，之後再租番15年。滙豐呢個舉動，引起唔少網友嘅興趣，話晒獅子銀行本地有好多小股東，喺《香港討論區》就有人猜測滙豐賣英國總行背後動機。
網友Apen作咗3個大膽嘅假設：第一，滙豐認為英國樓市已見頂，諗住賣咗去，用筆錢去增持交通銀行（3328）嘅股份，以維持交行發行A股後嗰19%嘅權益；第二，用呢筆錢去收購越南或新興市場嘅銀行；第三，因為美國房產按揭呆壞賬太高，諗住賣咗資產，做好盤數。
遷冊番嚟香港
Shaw就話滙豐動機好明顯，諗住喺英國樓巿泡沫未爆前，用最靚嘅價賣出去，睇死英樓市就嚟爆煲。Rogerlee亦話：「個價咁高，正常人都會賣啦，除非間總行有好大象徵意義啫，否則點會唔捨得賣！」
Eh352就講笑咁講：「佢可能準備將個總部搬番嚟香港啩。」而Wyhl0139就問：「唔知佢幾時賣香港總行？」Kris30就估佢遲吓為咗避稅，會將個總部搬去愛爾蘭㖭。
但Yshappy就充滿疑問咁問：「滙豐管理層一向都好有遠見，點會單單為咗估計樓市見頂而賣咗總部呀！如果係咁，滙豐早喺97年就應該賣咗香港總部啦！如果咁做，佢就會變咗地產商，而唔再係銀行家；但就算係地產商，你幾時見過新地（016）同長實（001）會因為樓市見頂而賣總部吖？究竟滙豐管理層因乜原因要賣總部，我真係猜唔到。」
唔會賣港總部
據本報較早前引述消息人士指出，滙控計劃賣倫敦總部係同新會計準則有關，因為使用率要達到80%嘅物業，先至算銀行自用物業，否則就當投資物業，要年年重估價值，咁會令業績好波動；為令業績完全反映銀行業務，所以就賣咗倫敦總部改為租。至於網友質疑會唔會賣埋香港總部，消息話唔會，因為滙豐喺香港總部嘅使用率超過八成。