間唔中都會聽到有外國回流買家，親身又或越洋託親戚入市買樓，最近有位名字叫「請教各位」嘅加拿大網友，諗住返香港買樓，一來度假用、二來退休後有個地方落腳，想搵300萬元嘅單位，但求交通方便、結構實淨、環境唔複雜，至於樓齡、間隔，喺香港、九龍定新界，全部都冇所謂。
嘩！乜範圍咁闊，又咁求其㗎！難怪《she.com》一眾網友叫佢畀多啲料至幫到手。請教各位補充話：「我想住屋苑，例如美孚新邨、黃埔新邨之類。」
fish回應：「就美孚啦！近地鐵，300萬可以買3房，但樓齡已30年。」小炒家就持相反意見，「你幾多歲，究竟已退休定即將退休？美孚同黃埔新邨都咁舊，黃埔花園咪仲好。再唔係嘉湖山莊，150萬買到810呎3房，有靚景、有會所。」
請教各位可能住外國太耐，唔熟香港，唔知嘉湖山莊喺邊，佢透露已年過40，𠵱家加拿大同香港兩邊飛，10年後多數留喺香港。
網友心唔止熟路一副專家口脗話：「當然唔好天水圍啦，樓價雖然平，但樓宇質素麻麻；揀市區樓啦，將來要賣都值錢啲。」小米就建議，「成日兩邊飛，不如買東涌，近機場，𠵱家有新盤影岸．紅，行5分鐘到機鐵，好方便。」
請教各位話對佢嚟講，東涌係新奇地方，下次返香港一定了解吓，多謝大家畀意見。
始終要落區自己睇
從以上嘅問答，反映請教各位對香港似乎所知有限，推測佢對樓市同樓價亦未必清楚。
買樓唔同買棵菜，仲要係300萬嘅樓，有錢都唔好亂買，問網友意見無妨，但始終要落區自己睇，仲要睇多幾區，比較多幾個屋苑嘅不同單位；若然睇新盤，千祈咪睇見示範單位就心郁郁、耳仔軟，俾經紀𠱁兩𠱁話抵買，盲中中就落叠，完全唔知發展商開高咗價。