九龍城寨變成「九龍寨城」，連名都改埋，叫我連發聲都有障礙。講起集體回憶，其實我們已經親手拆咗自己最寶貴的超級博物館，九龍城寨其實是一座可以幫我們生金蛋的寶城，但現在白白冇咗幾百億！我們連記憶都冇埋！當時好心做壞事的拆城寨支持者，個個都是歷史罪人！
我好懷念九龍城寨，它不但是現實中最不可思議的巨大迷宮，更是生命的原始森林，充滿港式冒險精神，單單一句「三不管」就令全世界的人睇到張口結舌，尤其日本人最為它瘋狂。先有6、70年代的黑道橫行，黃賭毒一條龍，要勞煩3千警察進攻城寨剷除。居民絕地逢生，鋼筋水泥立即縱橫生長，完全不經規劃的非法擴建、僭建如雨後春笋，充份發揮香港人的靈活走位，竟變出一座「世界上不可能有第二次機會」的偉大民間建築，最後住咗5萬人，人口密度等於每平方公里190萬人，冠絕地球，想起都驕傲過人，是奇迹。
城寨裏面的走廊不見天日、濕滑、電線縱橫、隨時漏電，火燭起來就一定大件事，衞生環境可謂極度惡劣，本來就不適宜人類居住，清場安置合理之至，所以20年前，1987年1月14日港府宣布耗資10億港元清拆九龍城寨，改建成現在的翻版園林公園，因為發現有塊「九龍寨城」石碑，更將佢還原到清朝時代，改做九龍寨城公園，「九龍城寨」從此消失。但問題是點解唔可以保留這座偉大建築，加以保育加固，咁就肯定可令香港的旅遊業收入源源不絕，香港記憶萬世長存！其實拆城寨就比北京拆晒啲千年城牆更壯烈，當時大家最關心的話題是用乜嘢方法拆，主流意識是來一次大爆炸，想起那片飛揚的塵海，我至今還殘存幻想，當然歷史沒有發生過這件事！
小時候去城寨探同學仔，最鍾意上天台看一看那片由無數天線築成的茫茫大海，還可以天台過天台，如履平地，十足神行太保；巨大的飛機在頭頂貼面飛過，震耳欲聾，但我幾乎可以用手觸摸到機底，後來坐飛機更興奮，我差點就睇到我同學仔在屋企食緊晚飯，那兩秒鐘的驚鴻一瞥，都算是人生的最大高潮。那兒最多潮州人，我同學仔話細個時，見過道友排長龍買白粉，排到出城寨，一路被人呼呼喝喝，拳打腳踐，人的尊嚴蕩然無存；又見過在外面「開片」完的黑幫，逃避警方追捕而大舉避入城寨。而我每次食魚蛋都會想起九龍城寨，因為市面上曾經有9成的魚蛋都是城寨特產。
京二
