有咗五個月嘅謝安琪（Kay）噚日為新碟喺屯門舉行簽名會，之前佢話出席完港台頒獎禮就會暫別樂壇，但最近頻頻出席活動，問Kay點解咁操勞？佢話：「吓！乜我真係有講過做完港台個頒獎禮唔出嚟咩？哈哈，唔緊要啦，咪當我又復出，之後再暫別囉。」唔通大肚婆記性真係差啲？
Kay仲話下個星期三做埋《勁歌金曲》之後就真係會收埋自己，休息期間會學吓彈琴同編曲，仲會開始籌備新碟。原來Kay已經一早book咗醫院，佢話：「我都有啲擔心冇床位，最近咁多呢啲爭床位新聞，搞到我驚驚哋，雖然係私家醫院，都係早啲book好啲。」
Fans做保鑣
至於噚日嘅簽名會，問Kay怕唔怕啲歌迷太熱情會整親佢，佢好放心咁話：「我啲fans好乖，會做我嘅保鑣，我唔係好擔心。」馮仁昭見Kay啲fans真係好守規矩，冇過份熱情。
