蔡一傑明天40歲生日，他前晚對男嘉賓又攬又錫。當嘉賓許志安與草蜢合唱《怎麼天生不是女人》時，傑仔主動與安仔跳辣身舞，他從安仔胸膛摸到下身，碰到拉鏈位時，安仔即拉開對方的手，惹得觀眾大叫。到安仔與三子合唱《將冰山劈開》，重演該曲MV的舞步，傑仔更捐安仔褲襠。
安仔叫傑仔做「姣傑」，又問觀眾：「大家覺唔覺得傑仔好靚女呀？」後來不少歌迷齊聲大叫「靚女傑」，傑仔看來也甚受落。安仔帶領全場觀眾大叫一聲「妖」，然後笑謂：「除咗遊行之外，都係第一次萬幾人一齊妖。」
阿葛呻蝕底
安仔又帶領觀眾唱生日歌賀傑仔，傑仔開心得捉着他親吻左右臉頰，安仔尷尬說：「乜你成日都係咁。」傑仔笑說：「法國錫三啖㗎。」安仔說：「呢度香港，唔係法國，唔使呀。」到軟硬出場表演後，傑仔分別擁抱林海峰與葛民輝，阿葛抵死地說：「又話唔啅我嘅？」