銀行分行數目越嚟越少，街坊要去銀行櫃位攞錢同處理戶口嘅話，真係既唔方便又費時失事，銀行公會舊年已經開始諗計仔，話要便利啲市民小額提款嘅需要喎。
於是由舊年11月開始，由馮國經家族揸弗便利店OK便利店，已經有幾家無聲無息地（點解要咁鬼祟），提供小額提款服務，方法係用銀行提款卡，但係市民就要先買嘢，買幾多錢嘢就冇限制（即係好似超級市場用提款卡攞錢咁），每次提款上限500大元，10秒鐘就可以搞掂一單交易喎。
雖然OK便利店強調呢項服務冇錢賺，由於客戶要購物先可以提款，點都帶旺啲生意啩！不過，OK便利店嘅貨品對於街坊嚟講，點都會貴過超級市場；華華提議，街坊可以買報紙時順便提款，咁做會比較化算。𠵱家呢個服務已經擴展至全港135家「OK便利店」，4月1號開始，全線253家分行都會有呢項服務。
[email protected]