股神畢菲特發達之道係長揸優質股，用呢個方法投資物業一樣掂，𠵱家就有辦畀你睇。
西半山旭龢道10號清暉大廈，67年落成，有個用家喺兩年後，用11.8萬連車位買入一個兩千呎嘅中層C單位用嚟自住，期間樓市出現幾個大升浪，佢都不為所動唔肯賣。最近趁豪宅狂潮，沽貨賺錢鬆人，約1150萬賣出，呎價5750蚊。
業主揸住個單位38年，勁賺1138.2萬，升值96.5倍，平均一年升超過2.5倍，咁嘅回報去邊度搵？係咪同股神有得揮？呢個業主冇投資物業，只係靠揸住個豪宅單位，就變成千萬身家；不過，都要佢識揀至得嘅。利嘉閣柯遵標話，𠵱家大廈僅餘兩個放盤，叫價高到9000蚊呎。
新界上車盤冇人吼
不過「同人唔同命」，另一個業主喺89年用約32.5萬，入咗屯門市廣場2座高層E單位，美聯葉初聲話，445方呎單位兩房間隔，有開揚景，質素算唔錯，剛啱以82萬左右成交，業主揸足18年，埋單只係賺得49.5萬，升值1.5倍，睇怕揸多20年，都冇可能暴升幾十倍咁誇張。
睇完呢兩宗成交，完全可以解釋到過去一年豪宅為乜炒到黐晒線，價錢幾唔合理都有人肯搶住買，但係啲新界上車盤幾平都冇人吼。優質豪宅同優質股一樣，揸得時間越長賺得越多，若果短炒出出入入，賺極有限，分分鐘賣咗之後，要用更高價至買得番。
[email protected]