華爾街有一句名言：當你使用95%人使用嘅工具，你絕對唔會成為另外嗰5%嘅贏家；因為當你跟95%嘅人做相同動作，絕對係企喺輸家一邊，被另外嗰5%嘅人去分咗你嘅財富。金融市場係一個零和遊戲，意味有人獲利時，另一方則虧蝕。在《貓貓論壇》上，網友papa123列舉投資者最容易犯嘅9大投資陷阱（見表），希望睇完後，你能例外地成為當中嗰5%贏家。
papa123指出，對於投資，唔同個性嘅人有唔同嘅做法，短線投機、中線操作、長線投資，就係投資市場眾生相中3種基本形態。
短線投資係「提高獲利次數」，而非提高單次獲利金額，同時透過不斷轉換投資目標，避免單一股份嘅風險。若短炒一隻股份唔想認輸抽身，決定長期抗戰，甚至企圖加碼溝貨；或者喺股價急漲之後唔願意獲利，就失去短炒嘅初步構想。
中線操作方面，唔同市場、行業都有唔同嘅景氣循環，對中線投資者嚟講，最怕就係受到市場流行題材變化嘅影響，搞到心猿意馬，呢個市場仲未開始爬，就轉到另外一個市場，結果當然一事無成。
短炒國壽 怕變長揸
至於長線投資，首先要避開嘅陷阱係「重視止賺止蝕位」。考慮止賺止蝕，代表你仍然只係短線或中線嘅投資心態。股神畢菲特曾經講過：「就算聯儲局主席對我透露未來貨幣政策，我都唔會改變既定做法。」畢菲特以長期投資聞名於世，佢嘅觀念係既然選擇咗呢隻股票，代表你相信呢家公司經營者嘅應變能力。所以，投資最佳策略就係「以不變應萬變」。
2628surewin回應話以28元買國壽（2628），原先打算短炒，點知愈跌愈勁，𠵱家變咗中線投資，希望唔好變長揸。網友lucky7好坦白咁話，除咗基金之外，個個人投資心態都只係短炒，邊個真係會等十年八年先收割。