美國財經雜誌《福布斯》早排選出06年中國富豪榜，當中超過四分之一人唔夠40歲，真係後生可畏。不過我哋啲普通人，40歲都係事業黃金期，收入應該有番咁上下。GOTAMOMENT喺《MSN討論區》問：40歲嘅人應該有幾多身家？
Seachange-on-the-horizon話，每個人嘅情況都唔同，好難一概而論。fpp講：「一個人到40歲應該有100萬美元（約780萬港元）資產，我係假設佢喺過去20年，每年投資2.2萬美元，投資回報每年約有8厘。」Drwood5反駁話：「除非佢薪金好高，或者係守財奴，否則好難每年投資咁多錢。」
tennisf16就話，一個人幾多歲應該有幾多錢，其實有數得計。
年齡×年薪÷10
著名理財刊物《隔壁的百萬富翁》（TheMillionaireNextDoor）列出一條簡單嘅方程式，只要將「年齡」乘以「每年收入」，然後除以10，就可以計出應有嘅「資產淨值」。不過，呢條公式只適用於工作10年以上嘅人！
另一暢銷書《自動百萬富翁》作者大衞．巴赫，亦有一條類似公式，佢話一個人應有嘅「累積資產總值」，係「現時年薪」乘以「現時年齡減20歲」，再除以3；而「累積資產總值」等於所有資產總值，減去總債務。