天氣持續寒冷，中國自古相傳食辣嘢驅寒暖胃，當中四川菜的辣至為聞名，而火鍋同煲仔菜亦行氣活血。至於日本人亦有地道暖身料理，包括勁辣拉麵、鍋物同咖喱，中日暖身辣菜可謂各有千秋，只要你有膽試！所以今日搞咗個中日辣食對決，專登搵嚟食辣永冇縮沙嘅姚瑩瑩同麥包，佢兩位試勻兩地辣菜，睇吓邊樣先係辣中之王！
記者：趙珮倩、林佩婷、林思樂
攝影：陳偉強、周旭文、林栢鈞、譚盈傑
化妝：KennisLee（姚瑩瑩）
髮型：PriceWong@
HairFestivalWalk（姚瑩瑩）
牛肉好滑，我食得好辣，所以接受到。但大豆芽索晒啲辣汁，我都有啲頂唔順！
瑩瑩食川菜辣到流鼻水
今次比試的菜式，是中國八大菜系之一的四川菜，其味出名香、辣、燙、麻；而出手炮製嘅係有13年歷史嘅雲陽閣川菜館大廚蕭師傅，師傅母親為四川人，他自小便嘗盡家鄉辣食，正宗川菜如水煮牛、川燒羊腩鍋，都是他的拿手好菜。
水煮牛肉$80
相傳北宋時，四川鹽工以鹽、辣椒、花椒製成辣湯燙熟牛肉，故名「水煮牛肉」。牛肉選用牛𦟌，腍而唔韌，順序鋪上花椒粉、辣椒粉、蒜茸、辣椒亁，最後灒滾油封住辣味，齋睇都辣，唔怪得瑩瑩都食到流算水啦！
熱辣指數：★★★★★
川燒羊腩鍋$280
麥包一見到有羊腩食就問侍應哥哥有冇腐乳，果然識食。以黑草羊腩配上子彈椒燜1小時，再熄火焗3至4小時，皮腍肉嫩又唔羶，壓軸材料係撒上少許當歸片增添香味。呢道菜行氣活血，天寒地凍食，正！而且呢度設有外賣鍋煲，可以將暖意帶埋返屋企。
熱辣指數：★★★★
鮮沙薑雞湯$88半隻/$160全隻
鍾意食薑的瑩瑩，平時自己煮乜都落薑，對呢鍋沙薑雞湯當然甚為欣賞。蕭師傅話當沙薑遇上雞，無論滾湯煮餸，味道都好夾，而沙薑可以驅寒暖胃，啱晒女士飲。
熱辣指數：★★★★
雲陽閣川菜館
地址：尖沙嘴彌敦道132-134號美麗華商場4樓（23750871）
營業時間：11:30am-3:00pm、5:30pm-11:30pm
交通：地鐵尖沙嘴站B出口，向佐敦方向步行約5分鐘
㷫烚烚新意邊爐
天氣冷，其中一樣最㷫烚烚的活動，當然是一大班人圍埋打邊爐。通常大家只識揀沙嗲或清湯做湯底，但今年「有骨氣」就新出幾個新火鍋湯底及配料，務求令大家過個有新鮮感嘅暖笠笠冬天。
四川麻辣魚頭鍋$120
講到出名火鍋，又點少得麻辣火鍋。這個火鍋特別之處在特登選用湖南辣椒，貪佢辣得來又帶香，而且還有去濕功效。半個鯇魚頭斤両十足，入口爽滑，食落啖啖肉。
熱辣指數：★★★★
藥膳水魚煲$138
這個鍋選用當歸、杞子、川芎等7、8種藥材煲8個鐘，用來打邊爐之餘，更可在打之前當湯水飲。水魚含有豐富的蛋白質同各種維生素，混合藥膳享用，據稱男士食咗能益氣健脾，女士則補血。
熱辣指數：★
新創4款火鍋料
1.「紅酒墨丸」──選用02年的波爾多紅酒做成酒心啫喱，配上日本黑毛豬肉及墨魚膠，食嗰陣真係要小心熱爆嘴（$38/6粒）
2.「白汁蜆肉水晶餃」──彈牙的水晶皮包住白汁蜆肉，中西合璧食法，口感幼滑，味道濃郁。（$38/6粒）
3.「千島汁墨丸」──當中的千島汁由師傅自行調校，甜酸度配合得更好。（$38/6粒）
4.「麻辣魚麵」──其誕生很偶然，為某次比賽而發明，誰料反應熱烈，故餐廳特別安排，令大家都享受到辣麵的滋味。（$38/1樽）
有骨氣海鮮酒家
地址：跑馬地摩理臣山道84-86號（23121212）
營業時間：11am-12pm
交通：地鐵銅鑼灣站A出口，向左步行約3分鐘
地道煲仔菜日賣80個
除咗辣嘢暖身，夠鑊氣的煲仔菜亦係不二之選。每到冬天，大角嘴鐵樹街的「川味港」份外好生意，店面雖然得幾張枱，但經常坐到出門口。因為店主威哥經常創新煲仔菜，由於他以前主力做川菜，所以當中還帶有四川風味。很多時他還自己調出秘製醬汁，材料還是從內地入貨，先可以做到原汁原味。
啤酒鴨煲$98
威哥經常創新菜式，啤酒鴨煲就是他最新作品。冬天飲啤酒會較凍，但用來整餸就完全冇問題。除咗有清香酒味，佢又加咗四川泡酸菜，混合起來，味道相當特別。
熱辣指數：★★
野菌重慶雞煲$118
用秘製的四川香料同醬汁慢火燉，加上從四川直接入口的茶樹菇，食落有濃烈四川麻辣味。
熱辣指數：★★★
川味港
地址：大角嘴鐵樹街46號川味港（98135761）
營業時間：6pm-2am
交通：地鐵奧運站C出口，向富多來新邨步行約8分鐘
投票結果：食客至愛水煮牛肉
今次由10位食客選出最辣嘅中國菜，結果，大比數認為至辣係水煮牛肉。
第一位 水煮牛肉 7票
第二位 羊腩鍋 2票
第三位 沙薑雞湯 1票
