呢輪推介過嘅股票，有兩隻在上周五大升，一隻係華基光電（155），另一隻係中化化肥（297）。唔使兩個禮拜時間，華基由推介價0.77元升上0.90元，升幅16.8%，而中化就由3.13元升上3.93元，升幅25.5%。
華基以雷霆萬鈞之勢，高收0.89元，成交更大增到3.14億股，係去年5月中以來的高紀錄。華基今次破位而上，短線可向去年12月底的1.10元高位推進，整固後再上，可上衝1.80元。
華基最近以ADR在美國上市，美國同類公司嘅市值講緊係400億元，PE成60倍，華基現時的市值只約34億元，今明年一有盈利回籠，股價就會三級跳。華基係一隻有概念的太陽能環保股，可食大茶飯。
金礦股股價表現，受金價升跌影響，金價由去年中的高位730美元回落，低見550美元之後形成雙底回升，近日已升破下降軌，上周五因炒賣金屬的對沖基金「出事」，導致金屬價格急挫，金價亦回落10美元，但可視為突破形態後的後抽，整固8個多月後的金市已開展大升浪，第一個目標係720美元，第二個係880美元。
黃金後市看好，金股亦會水漲船高，今年上半年會籌發A股的紫金礦業（2899）值得優先選取。紫金上周五收5.12元，升0.23元，升幅4.7%，本周股價若回軟，正係低吸機會。
未來盈利可大升
近兩個月，紫金走勢形成上升三角形，阻力在5.50元，若升破確認新上升浪開展，第一個目標係7.20元。
紫金回歸A股，最多發行1.5億股（面值1元），或15億股（面值0.10元），料集資約75億元，而現有的H股會10合1，變成50多元的大價股，但每手買賣單位將由2000股改為100股。
紫金係目前上市金礦股中蘊藏量最多的，達300噸，發行A股集資所得，將會用作中國境內的勘探、採礦、冶煉及銷售黃金和其他礦產資源，提供更多收益。06年（12月年結）盈利料增1倍至14億元，發行A股後，07和08年盈利可繼續大升。
郭兆誠