唔少潮人鍾意追買新款手機，究竟手機股買唔買得過？《MSN》討論區中，唔少網民都揀咗今年嘅心水股票。Horatiolegrand就揀咗全球第二大手機生產商摩托羅拉（Motorola），原因係：「摩記股價𠵱家喺52周低位徘徊，相當抵買，估計佢今年內會升20%，如果揸超過一年，佢嘅升幅仲可能唔止呢個數。我一定會買呢隻股，等佢大升50%或兩年後先沽。」
jhensc1亦認同摩記前景應該唔錯，「摩托羅拉盈利有雙位數字增長，市盈率約17倍，股價相對業內其他公司較低，加上標準普爾估計佢年內會有20%回報，應該買得過。」
不過，據商經雜誌《巴隆氏》報道，整個手機業都面臨壓力，摩托羅拉更加身陷困境，原因係摩記過去3年嘅業績一直靠RAZR系列嘅銷售帶動，競爭對手喺呢段期間就集中火力開發新型號手機搶客，1月初喺拉斯維加斯舉行嘅國際電子消費品展（CES）中，由摩記CEO桑德（EdZander）介紹嘅新產品少之又少，既然RAZR系列之後已無以為繼，佢嘅前景似乎唔多樂觀，起碼上半年嘅股價表現，都應該唔會有咩驚喜。
iPhone毛利達50.7%
難怪MeatyPython1都話：「不如買蘋果啦，佢哋已經改埋名，擺明玩轉型，唔止做電腦咁簡單，今年仲有iPhone做主打，單憑佢結合手機、上網同iPod功能嘅噱頭已經夠晒吸引，加埋蘋果聲稱搵到iPhone同iPod主要零件嘅平價生產商，即係話利潤將會非常可觀，咁股價咪更加有潛力！」
市場研究機構iSuppli初步估計，每部iPhone毛利達50.7%，仲話呢個利潤相當合理，因為iMac同iPodnano等產品嘅利潤，甚至超過45%。不過，由於蘋果要面對音樂手機市場嘅競爭，所以iPhone最初可能要削減利潤嚟降價搶客。