今日二月四日，農曆辛丑月己巳日，下午一時十八分就係立春之時，即係話過咗呢個時段出世嘅嬰兒，就係生肖屬豬，可講係豬年第一批嬰兒，譬如下午一點半出生，八字就係丁亥年壬寅月己巳日辛未時。
既已踏入豬年，新年餸菜少不了發財好市，但中文大學認真識揀時間爭取見報率，前幾日就發表真假髮菜研究報告，等我哋知道市面上有不少假髮菜，即使係真髮菜，食得多可能會老人癡呆，既然咁講，食髮菜可能遇上「假發財」，不吃也罷，何況中國早已明令禁止採摘、出口髮菜，以保護北方草原，免致沙漠化，我哋為人為己，都係唔食髮菜好。
香港嘅官方紀錄之中，正式申報入口嘅髮菜，去年唔夠五百噸，即少過五十萬公斤，除以七百萬人，每人每年在酒樓食肆家中吃了零點零七公斤，好似少啲喎。呢日啱啱碰到餐飲界前輩Ｌ哥，問佢髮菜入口數字真唔真，Ｌ哥話：「現今有不少枱底貨入口，唔入官方紀錄嘅，中國之外，邊度有其他國家供應咁多髮菜呀？入口數字唔真確，市面髮菜好多唔真確，總之平嘢冇好，你去一啲環頭環尾基層居民特多嘅街市買魚，特別便宜，因為多數係走私魚，政府根本管唔到。」諗吓，Ｌ哥可能係啱嘅，尖嘴Ｖ每星期去九龍城買魚，零舍貴過人，但佢話好好食。一次佢嘅親戚唔抵得啲魚咁貴，唔去九龍城買，走咗去新界某工業區買，真係平好多，但蒸好一入口，尖嘴Ｖ等食家面色一沉，原來平魚嘅質地差好遠也。
問Ｌ哥：「咁啲酒樓賣正式入口魚還是枱底魚？」Ｌ哥話：「有操守、要保全聲譽嘅酒樓一定賣枱面魚嘅，如果你入到一啲酒家，魚價平到你唔信嘅，你都識諗啦。」或者酒樓因為租金貴，唯有喺食物來料方面將就呢？Ｌ哥話：「咁又未必，總之視乎經營手法而定，譬如一間酒樓投訴租金貴，喊苦喊忽，其實揸fit人住在千萬元豪宅，以刻薄夥計見稱。」聽Ｌ哥講，好多事情如果挖深啲，誰忠誰奸，好難有結論。