「求大俠覺得紅軍俾富商收購，只係時間問題，邊個反對、支持都影響唔到呢個趨勢，只要日後將球會傳統保留，球迷對佢哋都會此志不渝！」
希望同曼聯、車路士喺聯賽拗手瓜嘅傳統勁旅利物浦，因早前同中東財團DIC傾極都傾唔埋欄，所以早早就開始轉移目標，同美國公司吉列搞夥伴關係，而呢宗交易已去到最後階段㖭。據講如果成事，利物浦領隊賓尼廸斯將獲1.5億鎊（約23億港元）擴軍，隨時買夠11個西班牙國腳返嚟都得呀！
傳聞，今年68歲嘅美國商人佐治吉列（GeorgeGillett），因抵不住經常被錢咬屁股嘅感覺，所以近年患上「瘋狂購物症」，乜都買餐飽；英國足球情報界透露，一旦交易成功，最開心嘅必然係紅軍領隊賓尼廸斯，佢將獲得1.5億鎊擴軍，勢頭勁過摩連奴咁話。
另外，利物浦前日喺打吡戰被愛華頓悶和，領隊賓尼廸斯條氣自然唔順，寸人哋係「細球會，只係識守波」。結果愛華頓方面即刻反擊，先由行政總監韋尼斯發炮，話呢個世界只有好少人覺得「拖肥糖」係細球會，估唔到名氣咁大嘅賓尼廸斯會狗眼看人低。
賓帥寸人慘遭還擊
跟住領隊莫耶斯更加寸「紅軍」使錢比愛華頓多好多倍，但愛華頓今季兩場聯賽對「紅軍」取得1勝1和，高下立判咁話喎。聽落又係喎，球場勝負論英雄，賓帥今次真係寸人反被寸囉。