有網友見近期大市非常波動，大陸又不斷推出宏調措施冷卻過熱股市，港股難免會受到影響，加上農曆新年將至，所以喺《香港討論區》問大家，會唔會喺新年前賣咗手上嘅股票套現過年？雖然有部份網友話過年需要多啲錢辦年貨，所以會先行沽貨套現，但大多數網友表示唔會賣，因為大市仍處於調整狀態，等到大市重拾升軌，先至高位沽貨。
驚平貨買唔番
網友mrcmc話：「過年要使好多錢，所以迫住要變賣股票囉。」網友CKn_n好同意：「新年前會放一半，唔係冇錢辦年貨。」網友owen_mama亦話：「到價就賣，希望快啲到價，因為新年會好忙，冇時間睇（股市）。」網友Chris0624好慘咁講：「雖然好唔想，但新年等錢使，都忍唔住要放貨走人。」
不過，好多網友反而指，雖然近期股市反覆，但中長線都係睇好，放咗咪買唔番之前嘅平貨。a44稱：「之前低位買入，如果𠵱家賣咗嘅話，恐怕將來會買唔番。」
網友HDSI笑言：「股市一日未回升，一日都唔賣。新年過後，股市會向好，𠵱家反而要趁低吸納，最多咪持貨兩至三個月，遲早一定升番。」網友etchai2002更指：「散戶先至會喺新年前急住賣股套現，而大戶通常有一大批長線貨，唔會因為一個新年就走人，走咗佢點可以買番咁平嘅貨呀。」