特首爭奪戰，二月一日正式開始。阿倫梁單挑當奴曾，未決鬥已勝負分明，好難有冷爆。好似一月三十一日跑夜馬咁，中貿林來電話要一隻必贏之馬，左丁山即刻話第五場二號「正隆」，並且對佢講：「正隆馬主陸增祺，係你母校校董，應該捧場吖。」誰知中貿林話「正隆」係兩倍大熱門，冇癮頭，唔想買。賽後當然知道「正隆」贏得好「伊時」。人就係咁㗎啦，想贏要穩陣但最好有幾倍回報。過往董驃做節目，有時講到：「今日幾好吖，開番幾場大熱門，益吓啲普羅馬迷。」左丁山對此有異議，大熱門多數益大戶，普羅馬迷性好扒冷，成日大熱門贏，佢哋多數輸錢。
中貿林唔通想買阿倫梁贏當奴曾，爆幾百倍大冷門？冇咁易！戰幔還未拉好，當奴躉已經向阿倫放箭，譬如一月三十一日阿倫宣布參選之日，《大公報》「井水集」已經話「梁家傑十足賈化」，內文最後一段話：「曾蔭權正是駕輕就熟，成竹在胸，而梁家傑恐怕只是《三國》中叫陣出醜當場的吳國『大將』賈化而已。」
左丁山讀書少，唔知吳國大將賈化係邊個，問熟讀《三國演義》嘅肥仔Ｋ。肥仔Ｋ話：「未聽過有一位賈化喎，吳國有一員小將，不是大將，叫做賈華，你睇番第五十四回『吳國太佛寺看新郎 劉皇叔洞房續佳偶』就知道嘞。」於是搵本《三國演義》睇第五十四回，睇到賈華係呂範吩咐埋伏在後，聽令撲殺劉備之人，其後陰謀穿煲，吳國太要斬賈華，經劉備好言相勸，得番條命仔。此賈華乃聽命於人之代罪羔羊而已。
諗諗吓，華之簡體字為?，唔通《大公報》作者寫慣簡體字，打字員一時睇漏化字下面有個十字，將賈華變成賈化？梁家傑點會係賈華呀？後來再一查再查，先知道《紅樓夢》內有一名大貪官名「賈化」，別號賈雨村，專門向上司拍馬屁，收賄款，被革職查辦，後貶為庶民。梁家傑係大律師，《大公報》將佢與貪官相比，直情係出一招要見血封喉。究竟在《大公報》眼中，梁家傑是賈華還是賈化呢？《三國演義》第五十四回提及賈華與宋謙係保護孫權嘅將士，冇乜「卡士」。無論賈華或賈化，梁家傑都唔肯對號入座啫。