人人都話入得廚房，就一定出得廳堂，獲得美少女廚神寶座嘅賈曉晨（JJ）當然入得廚房！不過估唔到，愛靜嗜深閨煮飯嘅佢，手車竟然都出得吓廳堂；從「學堂」出車只係2年，已經有非常豐富揸車經驗，唔少高速公路都有佢嘅足迹，正如佢話齋：「我細細個已經好喜歡揸車，當越過前面一架又一架車嘅時候，無車可以喺我前面，嗰種感覺勁爽，勁有滿足感㗎！」
文：吳心彥 攝影：陳陶鈞
髮型：Salonid@LingChow
驚險UTurn
長長牛仔褲、說話斯斯文文，係小記喺《美女廚房》對JJ嘅印象，今次同佢近距離傾偈，畀我再唔係唔出聲、斯文嘅感覺，換來嘅反而係驚險、搞笑、緊張三合一嘅深刻感覺！
小記做咗幾個月《同車蜜語》都未試過影夜景，適逢今期遇着個美少女廚神，於是決定嚟個美少女、夜景Crossover！約好JJ同佢助手喺灣仔金紫荊廣場會合，跟住一行人坐佢車兜去新翼對出嘅海傍，點知行行吓發覺無路口可以右轉入海傍嗰邊泊車，正當諗住繼續向前搵路UTurn時，JJ突然劈頭一句：「不如喺呢度轉入去！」嘩！唔係吓嘛，非法UTurn喎，仲好易俾迎頭車撞㗎，分分鐘俾警察拉，好彩最後JJ都無以身試法，沿番直路去行個大運先返轉頭，不過已夠小記嚇餐飽了！
教車師傅即場示愛
眼見JJ揸車手勢純熟非常，以為佢考牌多年，原來只有短短2年，「我考咗牌都唔夠2年，細細個已經成日坐阿爸架車周圍去，好鍾意揸車嘅感覺，幾年前嚟香港做嘢，就急不及待考牌了。」
考牌過程無蝦碌、無Take2，自動波牌一次過Pass！「可能我坐慣車，所以揸車起碼唔會驚青，感覺上亦好易上手，再加少少運氣就一次Pass！」不過最好笑嘅係，JJ竟然做埋駕駛學院代言人，更透露學車期間居然發生艷遇，不過被JJ吸引嘅並非他人，而係坐喺佢隔籬嘅師傅仔：「嗰位教車師傅竟然問我攞手提電話，話好想同我做朋友，不過我只係敷衍了事，最後梗係不了了之啦！」
一條冷踩上飛鵝山
揀朋友就相當謹慎，唔知JJ揀車又係點呢？「對車其實我無乜研究，好似呢架Peugeot306Cabriolet咁，其實係朋友2年前要移民，我就提議買咗佢，不過最後佢都係免費送咗畀我！」呢架306Cabriolet對JJ來說，可算係佢嘅親密戰友：「我好鍾意揸住佢四圍去，東廊、西貢、元朗、香港仔、去機場嗰條大路，都有我哋嘅足迹！」
最愛一個人揸車嘅JJ，講到明最喜歡夜麻麻揸快車，高速公路揸車起碼要80km/h！「我細細個已經好鍾意車，打遊戲機都要係賽車Game，見到前面有車就會有追車嘅衝動，你諗吓追過前面一架又一架嘅車，嗰種感覺真係好正！」飛鵝山絕對係唔少情侶喜歡談情嘅地方，不過對JJ嚟講，佢反而鍾意一個人直踩上山，「嗰日唔開心，加埋夜晚兼大霧，前面咩都望唔到，一邊上斜，感覺好刺激，嗰刻咩唔開心嘢統統拋諸腦後囉！」
半開篷醜死鬼
拍到差不多最尾個Shot，我同肥仔攝記叫JJ示範一次開同關埋個車篷，開篷本來順利搞掂，點知突然關唔埋，停咗喺半路中途，眼見JJ突然神色凝重，我同攝記都緊張起來，好彩經佢助手一幫，終於順利搞掂。之後問番JJ係咪怕整爛架車時，點知回覆是：「我最驚個篷半天吊，但又焗住要揸住出街，俾人見肯定醜死鬼啦！」果然緊張得來又帶點幽默。
開頂彎路王306Cabriolet
有彎路王美譽的Peugeot306，除頂級跑版外，同時也備有Cabriolet開篷版本；雖然306Cabriolet換上了開篷設計，但仍無損其跑車化的外表，其中於2000年引入的千禧版，廠方更特別為它加裝全車包圍㖭！引擎配搭方面，則以一台2.0公升直4偈作核心，單是馬力輸出已達135匹，而經過強化的底盤結構，走彎表現亦正好切合「彎路王」美譽。
Peugeot306Cabriolet規格
引擎：1,998c.c.直4DOHC
馬力：135ps/5,500rpm
扭力：18.7kgm/4,200rpm
傳動：4前速自動波
當年新車價：$218,000
現時二手價：約$60,000起