香港有個Paco幾乎逢捧必掂，日本更加有曾經點石成金嘅小室，唔知下一個金牌經理人係咪你呢？𠵱家XBOX360啱啱出咗隻《IdolMaster》，佢集合咗過往幾款正斗育成遊戲嘅必殺元素，有得養靚女又有得追，仲可以帶佢出去同其他「老竇」鍊過，一次過滿足咁多願望，唔怪得咁多機主積極追捧，搞到咁快就斷市冇貨賣啦！
文：陳福榮
鳴謝：I-Gamer.com.hk
呢隻《IdolMaster》算係日本XBOX360近期較為出位之作，唔係話佢好似《GearsofWar》咁搞到個個玩到發晒癲，而係好難得有廠甘願承受市場規模較細，出隻擺明放棄歐美用家嘅Game，誠意同膽識真係可嘉。不過由於佢嘅街機版已經喺日本養落唔少「電車男」捧場客，有關方面肯定計過晒數，一定回到本，先至擺喺360度出啫。
其實佢個玩法都算幾似好多年前嘅明星育成作品《誕生Debut》，都係揀個心儀美少女嚟培育，希望將佢捧成步姐咁紅；分別在於玩到咁上下你可以揀齋捧佢做Solo偶像，定係變成「穿屎」甚至三人組。好老實，梗係三人組有睇頭好多啦，話晒都算養眼啲嘛！
裝束飾物隨你鍾意
雖然個個女仔都有副清純面孔，着咩衫都咁有吸引力，但係每個「老竇」口味肯定唔一樣，所以遊戲利用咗主機嘅強勁性能，將啲女仔變晒做多邊形，咁就方便唔同嘅服裝配搭啦，唔使學2DGame咁來來去去得嗰幾種變化。假如閣下三人組嘅制服整得夠吸引，配襯令人更為之一振嘅飾物，咁樣透過相機就可以拍出獨一無二嘅現場演出相，有時搵真人都影唔到咁靚㗎。嗱，香港班偶像應該要學嘢啦，人哋咁落力載歌載舞，咁至係專業嘛。
放工約去行街街
響日本做得年輕偶像，好多都係得十零歲嘅妹妹仔，但做得經理人又肯定唔慌後生，唔通隻Game鼓吹大家媾𡃁妹？唔好諗歪，其實佢係想大家趁住放工同放假，帶班女出去散吓心唞吓，解除工作壓力之餘順便增進彼此嘅信任度同感情。就算追唔到做女朋友，𠱁得佢哋Happy換來更佳嘅舞台表現，點計都係有So，唔知香港嘅演藝圈「老竇」又係唔係咁𠱁班囡囡呢？
送成Set限定版公仔
本身隻Game冇行貨搞到已經唔平，佢嗰Set限定版仲標成差唔多兩千蚊，居然都俾人一出掃晒，到底有咩咁把炮要個個爭住搶呢？佢包括咗遊戲中全套11個美少女嘅模型公仔，每個都做得幾神似，神態活靈活現，響TGS嗰陣吸引唔少人影相㗎！此外仲有俾你放呢批公仔嘅特製演出舞台、B4Size全彩畫簿、收錄咗新歌嘅DVD以及精美面版，至啱鍾意靚女人物嘅玩家珍藏，事關佢都算有升值能力，隨時放返去日本都有錢賺。
機種：XBOX360
廠商：NBGI
類型：SLG 人數：1人
價格：$420（限定版$1,780）
查詢：27253338