今個情人節諗掂去邊度未？澳門星際酒店有個一擲「萬」金、2日1夜嘅超級豪華之旅（13/2至14/2號）！搭直升機、坐勞斯萊斯、99枝玫瑰，呢啲平時只會喺電影先出現嘅橋段，全部都準備就緒幫你冧女；收費唔貴，$19,999啫！以一次雙人歐遊嘅價錢博紅顏一笑，有邊個女仔去到唔開心到暈！
記者：朱崇德 攝影：陳盛臣
計一計 點解收$19,999？
$19,999聽落幾貴！但酒店表示：「呢個價錢只收回成本！」原來直升機1程每人需$1,800（2人來回×4＝$7,200），再加勞斯萊斯接送同特別節日附加費，呢度已差不多成萬蚊！再加1晚豪華套房價$3,800、香檳、99枝玫瑰、免費享用房間迷你吧、晚餐、LED愛的宣言，嗰度就花咗$9,999。如果嫌貴，仲有一個$1,800情人節套餐，住20樓以下的普通房間（約400呎冇客廳），包早、晚餐及雞尾酒等，都係玩2日1夜。
玫瑰香檳浪漫碰杯
RoomService包有一束玫瑰、香檳酒及果盤等。
LED顯示屏愛的宣言
酒店賭場內設有一個22×15米（足有2層樓高），全亞洲最大室內LED顯示屏；情人節當日會成為你愛的告示板，幫你揭示愛的宣言。
勞斯萊斯接送酒店
呢架勞斯萊斯可以話專為今次情人節而設，新車落地仲有陣新簇簇味！由直升機場直送你到酒店，CheckOut亦以此車送你上直升機。
落地玻璃按摩池
浴室使用全落地玻璃設計，Sally馬上諗到以玫瑰花瓣浸水療按摩浴，沖完真係成身香噴噴。
約800呎大豪華套房
Sally一入套房，已經有99枝玫瑰花為佢迎門，房間約800呎大，絕對豪華到痹。
直升機往返接送
平時過澳門多數坐船，大約1個鐘，轉坐直升機，只需十零分鐘即刻到馬交！
情人節套餐包酒店品味坊自助晚餐，閒日收費為$168；由於14號情人節會另加LiveBand表演、贈送玫瑰花及蠟燭紀念品，收費則略為提升至$308（4位或以上可獲折扣$268），進餐前大家留意。
火箭蝦亞拉斯加蟹腳
火箭蝦取自南中國海域的新鮮大頭蝦，入口爽脆兼味鮮，主廚阿Joe教路：「我哋用游水蝦做菜，熟後蝦隻通身變鮮紅；有舖頭用雪蝦、死蝦，煮熟變粉紅色㗎！」另外，Buffet落重本用亞拉斯加蟹腳，澳門亦係僅此一家，可見呢個自助晚餐誠意可嘉。
葡國牛排
葡式傳統菜，以芫荽、蒜頭及葡國欖油及白酒等調味，入口感覺有種粗獷的鄉郊風味！夾雜一口巴馬火腿及一口薯塊，感覺鹹香、腍軟，極富變化。
天籟奇緣（後）
浪漫滿屋（前）
浪漫滿屋是以士多啤梨酒及甜忌廉打成，入口微香；天籟奇緣是生果雞尾酒，酸酸甜甜最啱女士。
木糠布甸
製作配方取自某葡國名球星訪澳期間的「御廚」親傳，入口比一般木糠蛋糕輕軟，有如海綿的口感。
睇路搵食
星際酒店
電話：（853）28781111
地址：澳門新口岸友誼大馬路
路環雅憩
教堂前情人勝地
講到路環嘅雅憩，香港好多人識佢係因為劉德華套《全職殺手》，在路環聖方濟各教堂前取景；不過澳門人對佢嘅認識有34年歷史！更加係路環出名拍拖勝地，教堂前夠晒氣氛嘛！
卜卜辣蟹（$9/両）
以菜脯、辣椒、瑤柱、蝦子、蝦米、大地魚、蒜茸及亁葱等亁炒成辣料，再與約1斤大蟹同炒，配料樣樣惹味，味道比避風塘有過之而無不及，但相對油份少，食落脆卜卜，故名卜卜辣蟹。
西洋白酒花甲煲$65
好別致的葡式酒焗大蜆！將2隻手指大的新鮮花甲，以蒜茸、洋葱及欖油等先炒香，再以純葡國白酒（唔摻水）清焗，入口酒香、欖油味重，好能引出花甲的貝殼類鮮味。
睇路搵食
路環雅憩花園餐廳
電話：（853）28882086
地址：澳門路環計單奴街1號
交通：葡京賭場對出乘21A巴士至路環市區迴旋處落車
法蘭度
磚牆小瓦食葡菜
黑沙好多人都話係澳門最靚沙灘，夠長夠大，面向南中國海一望無際，特別多情侶鍾意喺呢度曬月光！不過呢度仲有一間14年歷史，以純正葡國菜聞名的法蘭度餐廳，磚牆小瓦、園林美景、焦黃燈光，配上陣陣葡式燒烤的肉香，浪漫情調滿到瀉。
燒排骨$65
一把把粗鹽抹上排骨上作鹽燒，純原始風味、食原肉香！據知純玩火路控制，外表甘香，裏面要有肉汁並夾滑，撒幾滴鮮檸檬汁，鹽味馬上在口中轉化為甜味，真係燒得幾高章。
燒乳豬$98
工程相當浩大，將原隻乳豬以葡國白酒浸過夜，加配料醃好後再以炭火慢烤；好味處是酒加肉香，嗒落肉質鬆化；不過最愛係佢個乳豬皮，真係脆到裂開，趁住熱食最一流。
睇路搵食
法蘭度餐廳
電話：（853）28882264
地址：澳門路環黑沙海漢9號
交通：葡京賭場對出乘21A巴士至尾站落車
