有個好日都唔聯絡嘅朋友，早排突然晨咁早就打電話畀我，仲要話有好嘢益我，叫我食完晏Check吓E-Mail咁話，嗰時心諗你好日都唔搵我，一搵就話有好嘢？但喺好奇心驅使下，最後都係走去開咗個E-Mail嚟睇，點知睇完之後即刻嘩一聲叫咗出嚟，原來佢講嘅好嘢，就係新款VolkswagenPassatVariant做咗警車呀！
見到啲相之後，就梗係即刻打電話問朋友，問佢呢啲相係點得返嚟，佢竟然好得戚咁同我講：「有日揸車經過舊機場，同車朋友突然話做咩後面無啦啦有部警車跟尾，正當連我都以為自己犯咗咩事嗰陣，點知由後鏡望過去，先發覺部警車原來試緊車，佢爬咗我頭之後先發覺部車原來係新款VolkswagenPassatVariant旅行車，如此難得機會，就梗係跟佢尾兼叫朋友拎部相機出嚟影番幾張相。不過部車車尾無貼係咩Model，但睇尾喉布局就應該係2.0Turbo啦！算有你心啦……（下刪100字）」哈哈，呢位朋友唔單止話畀我聽一班警察有新車揸之外，仲話埋畀大家聽日後喺條街見到PassatVariant旅行車嗰陣，就要小心小心啦！
記者：鄭達基